EDITORYAL - Mauwaw ta uy

Upat ka buwan na ang milabay gikan sa paglingkod sa katungdanan ni Mayor Tomas Osmeña apan wala pa siya’y gihimong lakang aron mahapsay ang dakbayan sa Sugbo.

Gawas nga gubot gihapon kaayo ang atong mga aseras nga gigamit sa mga abusadong magpapatigayon ug tag-iya sa panimalay nga moukopar sa sidewalk isip kabahin sa ilang lagwerta, wala pa usab mohimo si Osmeña og pamaagi pagsulbad sa paglunop sa mga karsada.

May mga tawo gani nga mitandi sa dakbayan sa Sugbo karon nga mas gubot pa kay sa termino sa kanhi administrasyon. Dili mabasol kadtong mga tawo nga mihatag sa maong obserbasyon tungod kay ang ubang mga piniyalan ni Osmeña nagpabaya lang. Ang dakbayan adunay grupo nga gitawag og Prevention Restoration Order and Beautification Enhancement (PROBE) nga kun hinuktokan pag-ayo puwerteng nindota og katuyoan ngano nga kini gimugna.

Apan ang mga sakop niini ingon sa nangatulog lang nga wala maghimo sa ilang katungdanan. Wala gani sila makabadlong nga adunay mga center-islands diha sa karsada gihimong hayhayan sa mga linabhan, sama diha sa dapit sa Osmeña Boulevard kagahapon. Daghang aseras ang dili kaagian og mga tawo tungod kay gikural kini sa tag-iya sa balay nga duol sa maong sidewalk, o kaha giukopar sa mga sidewalk vendors.

Mas makauuwaw ang nakit-an sa usa ka tigbasa ning maong mantalaan nga didto sa center-island sa Natalio Bacalso Avenue mga underwear ang gipanghayhay sa mga tanom taliwala sa karsada.

Kun nagkuwang man sa ilang serbisyo ang mga kawani sa City Hall nga gitugyanan unta sa beautification enhancement, ang mga opisyal sa barangay diha sa maong mga dapit kinahanglang molihok usab.   Kinahanglang molihok na ang mayor ug iyang taktakon sa serbisyo kining mga ligoy nga kawani nga suweldo ra ang giapas ug dili ang pagtabang nga molambo ug monindot ang atong siyudad.