Kakuyaw sa dengue

Bisan kun nipasalig na ang Department of Health nga down trending, kon nimenos na ang gidaghanon sa mga nataptan og dengue sa katapusang quarter ning tuiga, dili gihapon mokumpiyansa ug magsalig ang publiko.

Kinahanglan nga sa kanunay batonan ang pagpakabana sa pagpanglimpyo sa palibot ug mismo sa mga pinuy-anan. Dili lalim ang kakuyaw ug kabalisa nga bation, kun sa inyong pamilya dunay masakit og dengue.

Tungod kay hangtod karon, wala pay tambal nga makapakgang sa maong sakit. Masiri-siri ang si bisan kinsa sa pagpangita og mga pamaagi nga maluwas lang sa tino nga kamatayon ang ilang mga anak, paryente ug higala.

Hilabihan ka delikado sa dengue tungod kay adlaw ug oras lang ang paabuton ug posibleng diha-diha mamatay ang usa ka tawo. Ang labing sakit, walay mahimo ang mga doktor ug siyensya nga masanta ug mapugngan ang hinanali nga kamatayon.

Dugay na kaayo kining maong matang sa sakit nga hangtod karon wala pay klaro nga tambal. Aduna nay vaccine nga giingong makaalkontra sa kagaw, apan ang problema, dili pa kini ingon ka das-ag nga magamit na.

Gani, dinhi sa nasud, ambot kun giunsa sa paghuna-huna sa DOH nga duna sila’y gipalabi sa paghatag.

Ilang giuna ang mga rehiyon nga may taas nga kaso sa dengue. Ang akong batakan nga pangutana mao, ngano nga dili man tibuok nasud ang mahatagan sa maong vaccine?

Maghuwat ba diay ang Aedis Egypti nga lamok dinhi sa Central Visayas o sa bisan asa nga dapit sa nasud sa pagpamaak og tawo hangtod nga may vaccine na nga moabot?

Kun budget ang hisgotan, dugay na nga nakahibawo ang DOH nga ang dengue tibuok tuig nga motumaw ug sa mga panahon nga mosaka ang kaso niini.

Tungod sa kahadlok nga mamatay, ang atong mga pasyente sa dengue ug sa kakuwang sa edukasyon ug pagsabot sa maong matang sa sakit, magkabuang intawon kita sa pagpangita og sulbad.

Mohimo na kita sa bisan unsa nga pamaagi aron lang mabuhi ang pasyente. Dunay daghang mosugyot sa mga angay imnon ug buhaton tungod kay giingong nakaayo kini sa usa ka gi-dengue nga wala man lang gani husto ug klaro nga pagpasabot kun giunsa ug ngano nga naayo ang pasyente.

Mao na ang giingon nga sa maswertehan lang. May maluwas ug may gidemalas. Hinaot nga palapdan pa sa DOH ug ubang ahensiya sa gobiyerno ang pagpakabana alang sa paghatag kasulbaran ug husto nga edukasyon, ilabi na sa mga angay buhaton kun ang usa ka pasyente  nataptan na sa maong sakit.

Dunay daghang makalas sa dengue tungod sa walay klaro nga edukasyon, gawas nga walay kuwarta ang pamilya sa kadaghanan sa mga pasyente.