Subli nga pahimangno; nagbagang kasayoran N

Daghang tawo ang mag-ambahan gyud sa mga sam-ang karong Martes ug Miyerkules kay tradisyon na man nato ang pagduaw sa lubnganan sa atong mga mahal sa kinabuhi nga mitaliwan na.

Gani karon pa lang, daghan na nga mga tawo ang mibisita sa mga menteryo aron makapanglimpyo ug makapanagkot kay lagi magpunsisok na unya ang duot sa katawhan karong Nobiyembre 1.

Ang uban mopahimos sa long weekend aron makabakasyon ug magrelaks sa probinsya ug sa mga resorts. Ang inyong kabomberohan mopahimangno na usab sa publiko nga isiguro nato nga luwas ang atong panimalay sa dili pa kita mobiya.

Ngadto sa mahilig magdagkot og kandila diha sa mga altar kinahanglan nga masiguro nato nga mapalong kini sa dili pa kita molakaw. Isiguro usab nga ang tanang nakasaksak nga dekuryente nga appliances atong maibot ug gani mas labing maayo ug palongon nato ang plangka para makasiguro kitang walay supply sa kuryente ug layo ra unya sa sunog ang atong panimalay.

Ato usab isiguro nga walay hungaw ang hose sa atong LPG tank ug dili depektoso ang atong regulator. Ug kun inyong mabahoan nga dunay baho nga LPG, mas maayo nga ilisan ang hose o ba kaha ang regulator niini.

Alang niadtong buot mobiyahe gamit ang sakyanan kinahanglan usab nga atong isiguro nga kondisyon kini ug makasugakod og taas nga biyahe.

Kinahanglan nga atong ma-check ang sakyanan sa gitawag nato ang BLOWBAG (Battery, Lights, Oil, Water, Brake, Air ug Gas) sa dili pa kita mobiyahe aron dili kita maabereya ug malikayan ang disgrasya.

Gikan sa tanang sakop sa Bureau of Fire Protection 7 pinangulohan ni Sr. Supt. Samuel Tadeo, manghinaot kami nga malampuson unta ang inyong pag-obserbar sa All Saints’ ug All Souls’ Days.