Way middle ground? Pro ug anti ra?

Daghang naglibog ug nagduhaduha sa mga gipanghimo karon ni Presidente Rodrigo Duterte. Ang presidente pirmeng namasangil sa Amerika nga “bully” ug gihimong itoy-itoy ang Pilipinas.

Hasta ang European Union naapil sa kalagot ni Duterte. Nag-ugat kining tanan sa pagpasidaan sa US, European Union, ug United Nations kabahin niining nagsunod nga kaso sa pagpatay samtang gipangusgan ang kampanya batok sa ilegal nga drugas sa iyang administrasyon.

Gibalikas ug gipasanginlan sa presidente ang US, EU ug UN kay manghilabot lagi daw sa mga internal affairs sa Pilipinas, ug sila kunoy hinungdan nganong naglisod-lisod karon ug nikubol ang pagtubo sa ekonomiya sa nasud.

Sa mga nakasabot sa geopolitics, international relations ug policy making dili kaayo maglibog. Apan pipila ra intawon sa Pilipinas nga adunay kinaadman ang nakasabot niining mga isyuha? Labaw nang dili kasabot kadtong wa gyud intawoy nahuman.

Unsaon man pagpaabot ni Duterte sa iyang mensahe sa iyang buot ipasabot ngadto sa katawhan ilabi na sa mga kabus nga iyang gilabanan kun ang mainstream media gipasanginlan mang ‘bias’ ug may gipaboran.

Way lehitimong mga organisasyon nga “neutral” makahatud og impormasyon ug mensahe ni Duterte ngadto sa katawhan kondili kini ra gyung main stream media . Mao kini ilang propesyon, sa ngalan pa lang nga ‘media’ nagpasabot kini nga naa sa tunga.

Apan ang nakaparat man gud, daghang mga tawo nga wala gani kasabot mamasangil na man hinuon sa tanang media ilabi na kun ang balita o komentaryo negatibo kang Duterte.

Daghang wala masayod nga ang reporter igo rang mangutana ug ipatik o ibalita ang tubag sa mga pangutana. Tigsaysay ra sila. Samtang ang mga kolumnista  ug program anchors  moanalisar sa mga balita aron makahimo og opinyon.

Kinsa man diay ang tuohan kanang mga naa sa social media nga magpakaaron-ingnong mga “patriots?” Mga nagpatuong supporter ni Duterte ug mao nalay sakto samtang kadtong dili pro-Duterte ug dili gusto sa iyang mga programa ilang tawagong kaaway ug kriminal? Wa na lang diay ‘middle ground?’

Dili tanang dili pro-Duterte nagpasabot anti-Duterte na. Mao kini angay timan-an.  Kriminal na diay ang di mosugot sa gusto ni Duterte? Sa ato pa kadtong wala makagusto sa mga programa sa nakalabay nga mga presidente pulos pud diay kriminal? Ang mga tawo pro-Duterte, anti-Duterte ug kadtong naa lang sa taliwala pulos nangandoy og kausaban aron moasenso.