Hatagan og chance

Nangunay gyud si Cebu City Mayor Tomas Osmeña pag-atubang sa Court of Appeals isip respondent sa Petition for Writ of Kalikasan nga gisang-at ni Konsehal Joel Garganera nga nangayo og Temporary Environmental Protection Order (TEPO) alang sa Inayawan Sanitary Landfill.

Straight to the point ang mayor sa pagpasabot ngano nga dili mahimong diha-diha dayon nga ipahunong ang paglabay’g basura sa landfill kay wala pa may napilian nga alternatibong kalabayan sa mga basura. May pipila ka landfill nga gilantaw ang siyudad nga adto kini molabay’g basura apan kinahanglan nga mosubay sa proseso, labi na nga wala pa’y budget niini.

Mihangyo ang mayor nga hatagan sila’g lugway hangtod sa Enero 1 aron mangita sila’g laing dapit nga kalabayan sa mga basura. Apan gisupak kini sa kampo ni Garganera nga miinsister nga kinahanglang pasirad-an na gyud ang landfill kay naghatag kini og peligro sa panglawas sa katawhan, ilabi na kadtong nanimuyo duol sa basurahan. Nabalaka ang konsehal nga basin og ulahi na ang tanan kun adunay masakit ug makalas gumikan sa epekto sa landfill. Milanat og kapin sa duha ka oras ang gipahigayon nga oral arguments apan wala magkauyon ang duha ka kampo sa timeline kun kanus-a pasirad-an ang landfill.

Ang korte na ang mohukom human unya makaduso sa ilang position paper ang petitioner ug ang respondent. Sama sa pangutana ni Justice Gabriel Inglis, nganong dili naman lang hatagan og tulo ka bulan ang respondent?

Kun nakaantos man gani og daghang katuigan ang katawhan nga nagpuyo duol sa landfill sa paglabay’g basura diha sa Inayawan sa dugay’ng katuigan, walay rason nga sila dili makahulat hangtod sa Enero 1.

Gipasabot ni Osmeña nga dili mahimo nga i-short cut ang proseso. At least giklaro mismo sa mayor nga motuman siya sa gilatid sa balaod ug mihatag kini og klaro nga petsa kanus-a ipatuman.  Kun inig abot sa panahon nga mapakyas gihapon ang siyudad sa pagtak-op sa landfill, aw diha na siya nato paninglan. Tinuod, namilegro ang mga tawo nga namuyo duol sa basurahan apan mas dakong peligro kun ang tibook dakbayan ang manimaho kun ipasira dayon ang landfill sa Inayawan.