Dili kinahanglang moluhod

Duterte sa Amerika. Sumala sa mga nangahadlok, kuyaw kun mobiya kita sa Amerika kay ang kasaysayan makasulti sa kadugay na sa atong panag-alyansa. Pun-an pa sa panghadlok ni Duterte nga modangop siya sa China ug Russia.

Kinsa ba uroy dili mahadlok niana?

Pero taym pa. Nakaayo ba natong mga Pilipino ang pagpunay nato og hangad sa mga Amerikano. Siyempre! Daghang mga kompaniyang Amerikanhon ang nabuksan sa nasud ug naghatag og daghang trabaho. Daghang matang sa pagkinabuhi sa mga Pilipino inpluwensiyado sa Amerika.

Apan ang atong economic pattern para nako usa ka “subservience economy.” Gianad nato atong mga estudyante nga mohangad sa laing nasud. Wala nato tudloi paghigugma sa atong mga trabahoan. Gawas pa, maglisod kita pagpatrabaho nila kay gihasi ang mga industriya og “endo” og “contractualization” ug sa kagamay sa suweldo.

Sa Facebook, gi-post ang damgo ni Duterte nga maghimo ang nasud og kaugalingong “steel mill” aron aduna kitay atong mga pabrika sa puthaw. Ang mga sangkap niini anaa sa Pilipinas.

 Apan ang nangaging administrasyon miuyon pagpamina niini sa mga langyaw ug pagbaligya niini ngadto sa laing mga nasud. Busa laing nasud ang nakapahimulos sa atong natural resources.

Mao bitaw nga wala ko mabahala kun dili mokuyog si kanhi presidente Fidel Ramos sa biyahe ni Duterte sa China. Giangkon man niya ang tawag niya nga usa ka “amboy” (shortcut sa American boy). Kay pro-American man gyud siya. Graduwado siya sa West Point Military Academy sa Amerika.

Wala koy laing ikasulti sa pagka-presidente ni FVR. Apan iyang gipamaligya ang atong mga national corporations nga makapaadunahan unta kanato. Sama sa atong National Steel Corp. nga iyang gibaligya sa usa ka negosyanteng Malaysian, pag-privatize sa National Power Corporation, Petron, ug daghan pa.

 Ang maong buhat miresulta sa pagsalig nato sa ubang nasud sama sa Amerika. Mao na nga daghan kaayo kita og mga imported.

Hadlok kaayo kita nga mangawala ang hinabang gikan sa Amerika. Panahon na tingale nga undangon ang atong mentalidad sa pagkamakililimos. Tan-awa ang Israel. Usa ka gamay nga nasud, apan dili mahimong gawngan sa Amerika kay ang ilang prime minister nga Benjamin Netanyahu mosukol man sa presidente sa Amerika.

Apan nganong ang ilang tinuig nga hinabang moabot man og $3 bilyones? Unya sa Pilipinas nga hangad ug hadlok kaayo sa Amerika, gihatagan lang og $70 milyones. Mahimo kitang modawat ug magpasalamat, apan dili sab maayong isakripisyo atong dignidad.

Kun buot ni Duterte nga mobarog kita sa atong kaugalingong mga tiil pinaagi sa paghangop og “independent foreign policy,” mosuporta ko niini kun kini magtukmod pagpakig-alyado sa tanang mga nasud ma-Amerika, China, Russia, Japan, nga dili kinahanglang moluhod kita ning mga nasura.