Kalipay vs katagbawan

Kanus-a ba matagamtaman sa tawo ang kalipay ug katagbawan? Kun mobati ka og kalipay nagpasabot ba kini og katagbawan?

Sa pagsulbong sa teknolohiya, nagkapaspas ang dagan sa kinabuhi sa tawo. Kanunay nga magdali ug giapas sa daghang kalihukan nga gustong mabuhat dihadiha ug sa labing dali nga panahon.  Aron matubag ang mga panginahanglan ug kagustohan nisulbong ang mga instant. Gikan sa pagkaon, mainom, sakyanan, senina, komunikasyon ug uban pang batakan nga panginahanglan sa tawo.

Apan nibati ba kita og katagbawan samtang nalipay sa mga naangkon nato nga mga materyal nga butang o kalampusan?

O ni level up pa ang atong gusto nga makaangkon og laing mas nindot ug mahalon nga sakyanan, mas dako nga pinuy-anan, mas high tech nga gadgets ug mamili na sa mga tawo nga amigohon?

Unsa bay kalipay ug unsay katagbawan? Sa mga paghubad basi sa psychology ang kalipay usa ka  diha-diha nga pagbati sa usa ka kasinatian.  Sigon ni Daniel Gilbert, propesor sa Psychology sa Harvard University ang kalipay mao ang bisan unsang atong ganahan. Pananglit, bag-ong cellphone. Mahimong gihatag o ikaw ang nipalit, kana, makalipay nimo.

Apan, dili kini molungtad tungod kay matag karon ug unya mag-usab-usab ang atong gusto o gana. Samtang, ang katagbawan mao ang usa ka pagbati sa kalipay o kasubo samtang naghuna-huna ug nagtan-aw ka sa kinatibuk-an sa imong kinabuhi.

Wa pa hingpit maestablisar kun unsay mga tinubdan sa katagbawan sa kinabuhi sa tawo. Apan masabtan kini pinaagi sa kolektibo nga aksyon, kinaiya, sa mga yanong kasinatian, mas taas nga kahibaw,  mas lig-on nga personalidad, ang palibot ug sa mga kahigayonan.

Sa mga pagtuon nga gihimo, ang kahimtang sa pagpuyo maoy usa sa labing dako nga basihanan sa katagbawan sa tawo. Busa, sa mga datu nga nasud kansang batakan nga panginahanglan natubag, gikan sa pagpuyo, panarbaho, panglawas, edukasyon ug uban pa, sila moingon nga aduna silay katagbawan. Aduna sila’y kahigayonan nga makapili kun unsay ilang gusto.

Apan wala magpasabot nga kini na ang kahingpitan sa katagbawan. Dili magkaparehas ang katagbawan sa tawo tungod kay tagsa-tagsa kanato managlahi og hilig, panglantaw, baruganan ug kasinatian sa kinabuhi.

Nahimong basihanan sa katagbawan ang edukasyon, kuwarta, maayong pagkabutang ug uban pa tungod kay kini gihatagan og bili sa katilingban karon.

Apan ang laing matang sa katagbawan nga mahimong dili matumbasan sa kuwarta o materyal nga mga butang mao ang pag-umol og nindot nga relasyon diha sa pamilya, higala o bisan sa dili nimo kaila. Ang pagtahod sa opinyon sa uban bisan kun nasukwahi sa imong baruganan ug ang paghupot sa mithi sa pagpaubos ug pagpaabot.