Ang 2 ka dagway sa pagsulay

Kadaghanan wala kaayo kini kahatagi'g pagtagad nga matugkad ang kamatuoran. Ngano kita gihatagan og kinabuhi  nga gipakatawong may 2 ka dagway nga sination ang mga pagsulay. Ang pagpasar niini mag-agad kun unsa kalawom ang atong nakat-onan sa kabililhon ug katuyoan sa pagpakabuhi.

Nagkinahanglan kini'g mga pagtuon nga ang kinabuhi dili pamasin nga maghulat  lang sa unsay dangatan, bisa'g diyutay nga kalisud, maluya na. Angay ilhon nato ang 2 ka dagway sa pagsulay nga mao ang kalipay ug kasakit. Asa man kita karon niining 2 ka kahimtang  pulos kini mga hugna sa pagsulay.

Kun ugaling natawo kitang buhong sa bulawan ang atong namat-an dili pa kini mao ang swerte nga ikaw nagmadaugon na kay pasiuna pa lang kini sa pagsulay. Sagad di sab kalikayan bation ta’g kasina nga nagsud-ong sa uban nga nagtagbaw sa kalipay. Kaylagi grabe man gud sab nato giantos ang kasakit apan di pa kini utlanan nga dawaton ang tinuod nga ganti sa paglahutay.

Ang pagdaug sa kinabuhi wala ibase sa dagway sa pagkadatu nga sagad hinuon nga tungod niini daghan ang wa magmalinawon kay gihasol nga dili makatulog. Kay gipalabi ang kahakog nga angkonon ang tanan nalimtan ang giya sa pagdaug sa kinabuhi nga mao ang pagpabati'g kaluoy ug gugma sa isigkatawo, nga mao say pagsunod sa kabubut-on sa Kahitas-an.

Apan anaa ka man nga kanunay gikastigo sa hilabihan kalisud unya permi sab nagpakiluoy og panabang sa kusog nga makalahutay nga makaabot sa padulngan. Bisa'g padayon pa kita sa pakigbugno ning kinabuhia nakaseguro tang modaug sa pagsulay basta hingpit tang mobuhat sa kabubut-on sa Ginoo.