Mamma Mia

Kudos sa mga seminarista  San Carlos Seminary College  sa ilang malampuson nga musical drama.   Nalingaw ang kapin gatus nga mga nitan-aw sa ilang presentasyon. Kini maoy ilang finals sa ilang kurso sa dramatics ubos ni Monsignor Joseph Tan.

Napakita sa mga seminarista ang ilang  talento sa pag-arte, pagkanta  ug paghatag kalingawan sa mga nitan-aw sa  ilang presentasyon. Apan dili sa ilang pagkanta lang ang  tinuod nga come on sa ilang presentasyon.

Nilampos ang  mga seminarista sa pagdala sa ilang mga papel  isip mga babaye.  Ang ilang presentasyon mao ang musical nga Mamma Mia. Isip usa sa ilang mga audience ila  kong nadala ngadto sa esena sa maong  pasundayag.

Ang maong presentasyon kabahin sa ilang academic performance isip mga tinun-an. Apan gibuksan kini ngadto sa pipila ka tawo aron maka-obserbar ug makahatag sa ilang mga komento isip mga kritiko.

Bisan sa kalimitado sa ilang stage sulod sa audio visual room sa seminaryo ug sa props nga ilang gigamit nahatagan sa mga tinun-an sa hustisya ang ilang mga papel. Giangkon sa pipila ka mga seminarista nga lisod ang ilang gihimo sanglit kinahanglan sila nga moarte isip mga babaye.

Kiwaw, apan nahimong alegre ang kinatibuk-ang presentasyon. May pipila nga nawala sa ilang mga linya, ug kalit nga nilubad ang ilang mga tingog gikan sa dialogue ngadto sa pagkanta, tungod kay ilang gi-record daan ang kanta ug live ang ilang dialogue.

Usa sa mga cast nga nakapahimuot ug nakakuha sa atensyon sa mga nitan-aw mao ang karakter ni Tanya, nga gidala sa seminarista nga si Jake Barcenas. Sa mga eksena  nga naa si Jake kon Tanya mahugyaw ang mga nitan-aw tungod kay mahimuot sa iyang bakikaw apan husay nga pag-arte.

Apan ang comic character ni Tanya nagdala og inspirasyon sa mga nagtinguha nga mosulod sa bokasyon sa pagkapari. Gibutyag sa ilang propesor nga  si Monsignor Joseph Tan, si Jake kanhi security guard sa San Pedro Calungsod Shrine nga gidumala ni Monsignor  Ildefonso Leyson sulod  sa Archbishop's  Compound.

Kanhi Born Again Christian si Jake nga nihukom nga mosulod sa bokasyon sa  pagkapari. Karon graduating na siya.

Gitataw usab ni Monsignor Tan, gawas sa academics tuyo niya nga mahatagan sa kahigayonan ang mga tinun-an nga madiskubre  ilang kaugalingon ilabi na sa paggamit sa ilang talento dili para lang sa kalingawan kon dili nga ila usab kining magamit sa ilang mga bokasyon, ilabi na sa pagpakig-atubang ug pagpakiglambigit sa katawhan.