Unsa’y tulobagon kun dili iuli ang kinit-ang kuwentas?

Dear Atty. Divine,

Dunay nakit-an nga gold necklace ang akong amiga didto sa dalan duol sa ilang balay. Iyang gisuwayan og patan-aw sa ahensya ang maong necklace ug iyang nasuta nga pure gold gyud kini ug P30 mil ang dawat sa ahensya sa maong kuwentas. Nagplano siya nga iuli ni sa tag-iya apan wa man siya masayod kun kinsa ang tag-iya niini? Unsa may angayan niyang buhaton? Kun dili niya iuli ang maong necklace, aduna ba siya’y tulubagon? Daghang salamat. — Gina

 Dear Gina,

Base sa Article 719 sa atong Civil Code of the Philippines, kini nagkanayon:“Whoever finds a movable, which is not treasure, must return it to its previous possessor. If the latter is unknown, the finder shall immediately deposit it with the mayor of the city or municipality where the finding has taken place.”

Sa ato pa, kay wa man siya masayod kun kinsa ang tag-iya sa kuwentas, kini niya i-turn-over sa mayor sa inyong lugar. Ang mayor maoy mopahibawo niini sa publiko sud sa duha ka semana. Human unya sa unom ka buwan gikan sa publication kun wa gihapo’y motumaw nga tag-iya sa maong gold necklace, ang maong kuwentas mahimo na nga i-award ngadto sa imong amiga nga maoy nakakita niini. Apan kun pananglit dili niya i-turn-over ang maong necklace sa mayor ug mahibaw-an kini sa tag-iya nga siya diay ang nakakita niini unya wa niya iuli, then mahimo siya nga pasakaan og kasong pagpangawat base sa Article 308 (1) sa atong Revised Penal Code. Thanks and God Bless!  Atty. Divine

 Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.