Subad sa oportunidad

Inanay nang nalagas ang Team Rama diha sa konseho sa dakbayan sa Sugbo. Ug dakong pangutana karon kun makasustiner ba kining maong partido ni kanhi mayor Michael Rama sa pagka-mayoridad niini sa umaabot nga mga adlaw.

Sa niaging semana, mibiya sa Team Rama si Konsehal Dave Tumulak kay gusto kuno siyang mag-independente. Matud niya gihasulan na kuno siya sa nagkayagaw nga pulitika sa dakbayan mao nang di na lamang siya mosandig og partido.

Apan mitumaw ang  mga pagduda nga basin kun adto sa pikas tampi modunggo ang maong konsehal. Kini tungod kay sa iyang pagbiya sa Team Rama, gitudlo dayon si Tumulak isip usa ka deputy mayor ni Mayor Tomas Osmeña.

Gani gidungog karon nga paingon nang molukso si Tumulak ngadto sa Bando Osmeña Pundok Kauswagan ilalum ni Osmeña. Gumikan lagi kay gitudlo kini ni Osmeña isip deputy mayor dako gayud ang tsansa nga masuyop si Tumulak ngadto sa pikas tampi.

Sa akong tan-aw, pasiatab lamang ni Tumulak ang mag-independente. Wala gyud siya’y mahimo kun mag-inusara siyang maglatagaw diha sa konseho nga walay gidapigan. Usa pa, asa na man unya siya modakop og mga resources alang sa sunod nga piniliay kun magpatuyang siyang mag-inusara?

Gawas ni Tumulak, gitudlo usab ni Osmeña si Konsehal Hanz Abella sa Team Rama isip deputy mayor. Hinuon wala pay konpirmasyon gikan ni Abella nga mobiya na siya sa Team Rama. Apan klaro nga ang  iyang pagkatudlo sinyales sa iyang pagbiya sa maong grupo. Kining maong kalamboan nagpasabot lamang nga inanay nang migimok ang BOPK alang sa dakong misyon paglangkat sa mayoridad sa konseho. Ug dako ang posibilidad nga molampos kini sa rason nga daghan kini’g buyot nga ikadani sa mga kontra.

Hinuon sa pulitika dinhi sa Pilipinas walay permanente nga kaalyado. Ang mga magdudula niini pulos mga maral nga kun makakita og gamay nga gintang, dayon lamang og lusot aron pagsubad sa oportunidad. Eksperto na kitang mga Pinoy niini.