Pag sure mo oi!

Nagpuot sa bagang aso ang sulod sa tunnel sa South Road Properties kon SRP niadtong Miyerkules human masunog ang usa ka elf truck nga miagi sa tunnel dapit na sa exit padulong sa Dakbayan sa Talisay.

Napusnga intawon ang daghang mga motorista nga nangagi sa tunnel apan maayo na lang kay dali nga nakaresponde ang mga sakop sa Cebu City Transportation Office nga ni-manage sa mga sakyanan ug sila usab ang nakatawag og bombero nga nipalong sa kalayo.

Labaw sa tanan swerte gyud nga wala makabuto ang walo ka mga tangke sa oxygen nga karga sa truck kay simbako lang ug wala kadto madali sa pagdiskarga sa mga pahinante segurado gyud nga dakong trahedya ang nahitabo.

Bisan pa man sa ka dako sa kalayo apan wala mataranta ang driver ug iyang pahinante sa paghaw-as sa mga oxygen tanks aron dili na makamugna pa og mas grabe nga  problema.

Giadto nako ang CCTV monitoring center sa DPWH nga anaa mahimutang sa Plaza Independecia aron motan-aw sa actual footage sa sunog sanglit anaa ra gyud tungod sa CCTV ang fire scene.

Apan naka-lock ang opisina ug natagbaw pa gyud intawon kami sa pagpanuktok ayha giablihan sa kawani nga naka t-shirt og DPWH ug diha ra mi sa gawas niya giingnan nga kinahanglan pa namo nga mangayo og clearance sa ilang labaw ayha makatan-aw sa CCTV. 

Gawas pa dili kuno klaro ang kuha sa ilang cctv. Gihatagan ko niya og number sa ilang labaw sa DPWH Cebu City apan walay motubag. Mi-return call man tuod ang opisyal apan nakauli na ko sa estasyonan ug wala diay siya masayod nga naa silay cctv monitoring nga nahimutang sa Plaza Independencia.

 Ha? Pag sure diha ma'am. In fairness hinuon ni Director Ador Canlas ug sa ilang PIO mga maayo ra og pamatasan. Mas maayo seguro nga pahinumduman ninyo ang inyong mga kawani sa Freedom of Information nga gilagdaan ni Presidente Duterte.

Hinumdumi nga lahi na ang patakaran sa kanhi namunoan ug sa kasamtangang administrasyon ni Digong.