Daghan ang apektado sa SOCE sa Liberal Party

Mitingog na si Jeffrey Jaguar Diaz human sa pipila ka tuig nga pagtagotago human siya miundang sa negosyo sa ilegal nga drugas. Nagpa-interbiyu siya sa reporter sa DyRF nga si Rowena Capistrano ug gipatik dinhi sa Banat News ug sa The Freeman.

Adunay misimpatiya sa nahidangatan ni Jaguar, tungod sa iyang kaguol nga dili na siya makatulog maghayang ug dili na makalakawlakaw kaniadtong anaa pa siya sa negosyo sa ilegal nga drugas. Apan si Police Regional Office-7 Director Patrocinio Comendador, imbes mohatag og kahigayonan sa pag-usab ni Jaguar ug pagbiya na niya sa maong negosyo, miingon hinuon kini nga dili pa siya madakop kay wala pa silay gigunitan nga warrant.

Gihimong basehan ni Comendador ang mga pagpangronda sa kapolisan sa lugar ni Jaguar. Apan ang wala tingale mahibaw-i ni Comendador nga ang sunodsunod nga pagpangronda sa balay ni Jaguar nahitabo sa dihang miundang na kini sa maong negosyo. Mao nga maayo tingaleng tan-awon kun dili ba overkill ang pagpalusot og warrant sa mga ronda batok sa tawong miundang na sa binuang.

Angay ba nga ipadakop ug kasohan ang tawong naninguha sa pagbiya sa ilegal nga negosyo?

Akong hagit sa kapolisan, ayaw ninyo ipunting ang inyong puwersa ngadto sa tawong nagbag-o ug mibalik na sa sabakan sa balaod. Adunay daghan pa nga drug lord nga wala pa gyud ninyo tandoga. Ayaw ko'g ingna, wala makaila ang mga polis sa usa ka drug lord kang kansang igsuon na-elect pagka-bise mayor sa usa ka lungsod. Aduna pay usa ka drug lord nga residente sa usa ka lungsod sa south, ug adunay usa nga anaa sa silingang bridge city.

* * *

Ang kapakyas sa Liberal Party pagsang-at sa Statement of Contributions and Expenditures sa eleksiyon kaniadtong Mayo 9,  kuyaw nga makaapekto sa mga lokal nga kandidato. Tungod sa kapakyas sa LP pagsang-at sa SOCE ngadto sa Comelec niadtong Hunyo 8, kuyaw og dili makapanumpa sa katungdanan ang mga na-elect nga opisyal nga sakop sa maong partido sa udto sa Hunyo 3.

Kun mao kini, silang Mayor-elect Tomas Osmeña ug Gobernador Junjun Davide kuyaw og dili makalingkod sa Hunyo 30, ang adlaw nga gitakda sa Konstitusyon paglingkod sa napili sa miaging nasyonal ug lokal nga piniliay. Gawas kanila, ang mga konsehal, bokal, kongresista ug senador nga midagan niadtong Mayo 9 ubos sa LP, kuyaw og dili makalingkod. Kun mao kini, ang mahimong acting mayor sa siyudad sa Sugbo mao si Bise Mayor Edgardo Labella. Ang kuyaw mao ang sa probinsiya, kay silang Davide ug iyang bise gobernador nga si Agnes Magpale pulos ubos sa LP.

Sumala pa sa usa ka Facebook post, nalangay ang LP pagsang-at sa SOCE tungod sa kahadlok sa mga negosyanteng misuporta kang Mar Roxas nga panimaslan sa administrasyon ni President-elect Rodrigo Duterte. Adunay nag-ingon nga nagamit usab ang Yolanda funds, ilabi na sa gipamayad sa mga artista nga endorsers.

Apan maayong mosang-at gyud ang LP og SOCE.