EDITORYAL - Lunop ug baha

Hapit na gyud muabot ang ting-uwan. Pipila ka adlaw gikan karon, masinati na usab sa katawhan nga maglunop ang mga lupa nga bahin dinhi sa dakbayan sa Sugbo, ilabi na ang downtown area.

Kun kini mahitabo, walay laing mabasol niini kun dili ang administrasyon ni Mayor Michael Rama nga wala mohimo og pagpangandam dihang panahon pa sa grabeng huwaw.

Panahon na unta kadto nga malimpyohan ang mga drainage systems, makuhaan og mga sagbot ug lapok ang mga esteros aron nga pag-abot sa ting-uwan, makadagayday ang tubig ngadto sa dagat.

Klaro kaayo nga nalingaw ang mga politiko sa pagpangampanya ug nahikalimot sila sa ilang obligasyon nga mao ang pagsiguro nga dili na mahitabo ang dugay na kaayong problema.

Nabantayan nga adunay mga drainage project diin gipadak-an ang mga imburnal, apan ang problema kay wala nila paladmi ang sapa nga maoy agasanan sa tubig paingon sa dagat.

Sa ato pa, mosuyla ra gihapon ang tubig sa sapa, ilabi na ang gitawag og Parian Creek nga anaa magsubay ilawom sa mga dagkong tindahan sa dalan Colon nga maoy sagad moawas kun may uwan.

Ang gitawag og La Niña molungtad usab og pipila ka buwan nga subsob ang pag-uwan ug musangpot sa paglunop ug pagbaha sa daghang mga dapit dinhi sa dakbayan.

Kinahanglan nga ang administrasyon ni Mayor Tomas Osmeña dili gayud magpangikog sa paghimo’g kampanya ngadto sa mga tawo nga nakapagamay sa gilapdon sa kasapaan ug maoy usa sa nakaingon sa problema sa pagbaha.

Angay’ng kalimtan ni Osmeña nga posible nga kining maong mga tawo nga nagtukod og panimalay daplin sa kasapaan apil sa mibotar kaniya sa miaging eleksyon ug maoy ipatigbabaw niya ang paghatag og sulbad sa dugay na kaayong problema.