Mr. Barangay

Brgy Fuente, Carmen, Cebu

Naunsa na man ning mga kahoy’ng tugas diri sa among bukid nga gihurot na man sa pagpanggabas. Asa na man ang taga DENR nga wala man sila kabadlong niini nga klaro man ni nga wa gyuy permit? Naa man untay gibutang diha nga gwardiya, nganong wala man kabadlong?

Brgy sta. Rosa, lapu-lapu city

Diri dapit sa Sitio Bunga daghan kaayong mga binuhi nga baka ug kanding nga naa lang itugway daplin sa karsada. Daghan nang nadisgrasya nga mga motorista diri kay mokalit lang og labang ang mga hayop sa karsada.

Brgy Banilad, Cebu City

Nibalik na man og estambay ang mga rugby boys atbang sa Country Mall ug kilid sa PDI Condo nga nakahasol sa ubang mga tawo nga moagi. Naa say ubang mga batan-on diha nga mag skateboard sa dalan nga kuyaw sab sa mga sakyanan.

Brgy Tungkil, Minglanilla, Cebu

Awhagon namo ang mga opisyal sa lungsod nga ila untang sultian ang mga garbage collectors nga kuhaon ang mga basura diri dapit sa Deca Homes kay pila na ka adlaw nga wala kuhaa, nagbaho na ang uban ug kuyaw makamugna ni’g sakit, labi na sa mga bata.

Brgy Pajo, Lapu-Lapu City

Diri sa may Seaside wala man gyud humana ang pagtrabaho sa karsada, ila ra man gibiyaan ug daghang nahasol nga molupyo diri. Luoy kaayo ang mga tawo diri labi na kun mag-uwan kay magbaha dayon, lisud nga iagi unya lapok pa gyud kaayo ang agianan.

Brgy Busay, Cebu City

Sir hangyo unta mi sa mga opisyal sa siyudad o ba kaha sa LTO-7 nga hatagan og ID ang tanang habalhabal driver nga nagbiyahi diri sa bukid kay daghan na kaayo badlungon nila. Gani bag-o lang sir naay milayat nga pasahero nga babaye sa gisakyan nga habalhabal kay wala ihunong sa gusto niyang kanaugan unya gihikap sa driver.

Brgy Maguikay, Mandaue City

Sa Sitio San Jose naproblema gyud mi sa kanal ug basura labi na kun mag-uwan kay dali kaayong magbaha. Unta matabangan mi diri sa labing dali nga panahon kay hasol kaayo namo diri kun dunay uwan kay ang basura magpundo sa kanal maong dali ra mosanap ang tubig.

Brgy Pit-Os, Cebu City

Moreklamo ko sa pag-abuso sa ubang mga drivers sa habalhabal ug PUJ kay patuyang lang og parking sa ilang sakyanan halos na lang naa sa tunga sa karsada. Naa man untay mga traffic enforcer nga gipahimutang diring dapita pero wala man sila kabadlong, unsa kaha’y rason?

Brgy Poblacion, Carmen, Cebu

Maayo unta og maatiman ning karsada namo diri, labi na sa Upper Camoning, kay ang drainage padulong sa subdivision kay daghan kaayo’g sagbot, hugaw kaayo unya dugangan pa nianang mga hinugas nga anha ra isabyag sa tunga sa karsada.

Brgy Kawit, Medellin, Cebu

Naa lang koy reklamo bahin sa wa’y ayo namong mga tanod sa barangay kay naa unta ko’y ipa-blotter nila nga hitabo apan gibalibaran ko kay wala kuno sila’y ballpen. Unsa man diay nang among barangay dili kapalit og ballpen?

Alang sa inyong mga reklamo text lang sa 09326425494