Mahimo man lagi!

Mao kini akong reaksyon sa sagunson nga operasyon sa kapolisan batok kriminalidad diin miresulta sa pagkamatay sa mga drug lords.

Didto sa kauluhan, sa miaging semana pa gisugdan ang Oplan Rody (Rid the Streets of Drinkers and Youth) diin gatusan na ka palahubog sa karsada ug mga batang libud-suroy ang gipangdakop.

Mahimo man lagi? Sa nangaging mga presidente, ngano wala man himoa ang paglimpyo sa nasud batok ilegal nga drugas, mga palahubog, ug paggukod sa mga ginikanan nga nagpabaya sa ilang mga anak?

Nalukop sa dinagkong mga butang ang nangaging administrasyon, nakalimtan hinuon ang pagdisiplina sa mga Filipino. Ug si Davao City Mayor Rody Duterte ra gyud ang nakahunahuna niini.

Dinhi sa Sugbo, misalida dayon si Mayor-elect Tomas Osmeña. Wala pa gani siya makalingkod sa Cebu City Hall, nanghatag na siya og reward money sa mga polis nga makapusil ug makapatay og kriminal. Bisan ang ronda didto sa Bohol nga mipatay sa druglord nga si “alyas Yawa” nakadawat ang mga polis og reward gikan kang Tomas.

Usa lang si Tomas sa mga mayor nga misundog sa estilo ni Duterte. Didto sa kauluhan, adunay mayor nga miparada sa mga drug pushers tuyok sa publikong lugar aron pakaulawan sa dautan nilang negosyo.

Sa Manila, ang mga polis abtik na kaayong nanakop sa mga palahubog sa karsada, mga ginikanan nga naglaruylaroy ug nagpabaya sa ilang mga anak, ug daghang mga bata nga naglaaglaag sa kadalanan ang gipangpik-ap.

Kun maglaag ka sa uptown area, daghan kaayong mga batang libud-suroy nga walay kalibutan sa nagsingabot nga kausaban. Diha’y bata nga akong gipangutana kun kaila ba siya ni Duterte, mitubag siya nga nakaila siya.

Apan sa dihang akong gipangutana kun nahibalo ba siya nga limpyohan na ang karsada sa mga batang sama niya, ang tubag sa bata: “Di ko motuo.” Wala pa mabati sa maong bata ang programa ni Duterte, apan sa Manila, nabati na kini sa daghang bata nga gipangpik-ap sa kadalanan.

Dili lang mga batang libud-suroy ang angay hiposon sa siyudad sa Sugbo. Adunay daghang mga bayong-bayong ug mga edaran na nga naglibud-suroy. Daghan pa niining sama nga mga tawo ang manghingi, sama nianang mga “bantay boys” o “watch your car boys” nga mamugos og paningil og kuwarta bugti sa pag-parking sa sakyanan sa bisan asang lugar sa siyudad. Ang nakaparat kay kun dili hatagan, sa sunod balik, tadlasan na og lansang o bildo ang sakyanan.

Ang programa ni Duterte gitan-aw nga posibleng molapas sa tawhanong katungod sa mga kriminal. Apan para nako, mas maayo tingale nga balihon usa nato ang sitwasyon: Atong unahon sa pag-atiman ang tawhanong katungod sa kinabag-an nga wala magpabadlong. Atong unahon ang tawhanong katungod sa mga umaabot biktima ug kadtong mga nabiktima na sa krimen.