EDITORYAL - Insulto sa mga bayani

Saulogon sa Pilipinas karong adlawa ang ika-118 nga kagawasan gikan sa mga kamot sa mga mananakop niini. Ang tema karong tuiga ‘Kalayaan 2016: Pagkakaisa, Pag-aambagan, Pagsulong.’”

Gipaabot nga adunay dagkong selebrasyon sa nagkadaiyang mga lugar dinhi sa Pilipinas ilabi na sa Manila diin mahimutang ang monumento sa nasudnong bayani nga si Dr. Jose Rizal ug uban pang mga rebolusyonaryo nga Filipino nga nakigbatok sa mga Espanyol, Briton, Amerikano ug mga Hapon.

Sila kadtong mga Filipino nga wala maglantaw sa ilaha ra nga kaugalingon, kun dili, alang sa kaugmaon sa tanang mga Filipino nga makabaton og kagawasan.

Apan aduna gihapo’y mga sektor o mga grupo nga nagpatuong sila maoy mga modernong bayani ug ang ilang tingog ra ang husto kay ang kinabag-an kuno mga sayop. Angay hinumdoman sa tanan nga ang kahulogan sa kagawasan wala lang nagpasabot nga pagkalingkawas gikan sa kadena sa mga mananakop.

Ang tinud-anay nga kagawasan mao ang kagawasan sa pagpili, pagpuyo, pagtungha, pagtrabaho, kagawasan gikan sa kagul-anan, problema, pagpangita og solusyon, edukasyon, seguridad, ekonomiya, impluwensya ug uban pa.

Dili makiangayon nga kwestyonon paglabay sa 118 ka tuig kun gawasnon ba gyud ang Pilipinas karon kay ang naghimo niini hilas o kuwang lang gyud sila og pagsabot. Nakalimot ang uban nga gibuhisan og kinabuhi sa mga bantogan ug dili bantogang mga bayani sukad pa sa panahon ni Lapu-Lapu hangtod ning mga gutloa ang natagamtaman karong kagawasan sa mga Filipino.Dako kining insulto sa mga nagsakripisyo sa ilang kinabuhi alang sa nasud.

Ang pakigbisog karon dili na paagi sa armas ug kanyon, kun dili, ang tagsa-tagsa ka paningkamot sa matag usa aron mahaw-as ang ilang pamilya sa kalisod ug makatampo sa paglambo sa nasud.

Ang bag-ong mga rebolusyonaryo mao kadtong mga tawong nanarbaho, nagbayad og buhis, nanikay-sikay aron mabuhi ug makatampo sa nasud, dili kadtong mag-martsa martsa lang sa kadalanan ug mo-lecture sa katawhan sa mga bati sa gobiyerno.