Pamalandong makapalig-on

Usahay, may mga oportunidad nga moabot sa kinabuhi, nga kun kini mobulig kanato, dili sab kalikayan nga sa pagpatunhay niini sa kalamboan, kutawon sa kalibog ang atong panghunahuna. Pugos mamasin bahala'g unsay dangatan, kay maoy nipasulabi ang naghinubrang kahinam nga kapahimuslan apan maoy naangkon, ang kadismaya nga naunlod sa kawad-on ang paglaum. 

Tungod kay gikapoy ang galatagaw nga panghunahuna, nga wa gayud katugdon o kahinultol sa angay nga buhaton. Kaanugon sa nausik nga higayon, hangtud naluya nga nawad-an na'g kusog, ilahutay ang pakigbisog sa kinabuhi. Mosagop na lang sa way kaseguroan, bisan ang epekto niini makahatag pa'g mas makapaugtas nga kaluyahon, nga sination ang kahapdos sa kasakit.

Apan wa kita masayud kun unsa kita kalig-on sa paglahutay. Kinahanglan makapundo kita'g kusog, dili kay iutong lang nga mosugot kahutdan og hangin, nga naa may paagi nga makaseguro kita pagkab-ot sa idlas nga kalampusan.

 Simple ra ang atong buhaton, nga kun sa atong paminaw medyo hapit na mo-awop ang katin-aw sa maayong panghunahuna, irelaks kini pinaagi nga hatagan og higayon nga kita makapamalandong. Palugdangon ang gubot nga kaisipan. Pakig-estoryahan ang kaugalingon. Tagsa-tagsaon, aninawon ang mga plano o desisyon, nga sublion kini pagrepaso ang angay himuong kausaban.

Niini, mobalik ang kalig-on sa atong paglaum, kay ang kahayag sa pagmatngon, mogiya aron di na ta masud sa gahong sa kapakyasan. Apan may limitasyon ang katakos nga malantaw ang kinutubang maabot ang pagdaug.  Mamalandong sab kita sa Dios, mangamuyo nga kita iyang katabangan. Basta mosunod lang sa Iyang pagbuot, di gyud ta balibaran sa atong panginahanglan.