Lipot nga lipat-lipat Ang
Ang dagway nga determinadong gitagoan ni Senador Bongbong Marcos atol sa kampanya wa kapungi nga nabantang sa iyang pagkuwestiyon sa iskutenyo sa vice presidential election: Kadesperado sa gahom. Atubangan sa pagdudang naghigwaos sa Malakanyang tulo ka dekada human napalayas sa EDSA People Power niadtong 1986, nagmatngon si Marcos nga di kapasanginlang uhaw sa gahom sa iyang pag-apil sa piniliay niadtong Mayo 9.
Way nagtagad niya hangtod nga nagsugod pagdominar sa surveys. Uwahi nang mga biktima sa diktadura sa iyang amahan nga nakalusad sa kampanya batok sa iyang kandidatura. Ang kakugang ni Marcos sa kapaspas sa paghiusa sa kinabag-an pagsalikway niya nakapatumaw sa tinuod niyang bayhon.
* * *
Tuyo nga gihuptan ni Marcos ang mapanagan-on nga postura sa pagsugod og kisaw sa mga ambisyusong mag-presidente ug mag-bise presidente. Bisan sa sibaw nga mga huhungihong nga ganahan siyang mohupot pagbalik sa katungdanan sa diktador niyang amahan, ug tungod sa kabalaka nga di pa andam ang mga Pilipinhon nga modawat pagbalik sa ilang bansagon sa Malakanyang, gipili niya ang kamapailubon pinaagi sa pagdagan una pagka senador niadtong 2010.
Human nasuhid ang politikanhong palibot, gipaubos na sang iyang panglantaw sa 2016. Wa hinuon maagpas sa tanan niyang banabana nga ang tinuod nga mapanagan-ong niapil sa nasudnong politika maoy mamahimong labing dakong tunok sa iyang agianan. Ug nakahukas sa dagway nga dugay na niyang gitapin-an.
* * *
Mahimong nahuman nang opisyal nga iskutenyo sa imong pagbasa ini, mahimo ganing natakda na sa National Board of Canvassers (NBOC) ang proklamasyon sa bag-ong presidente ug bag-ong bise presidente, apan ang bisan unsang pagduda kinsay mananaog sa hingpit nga vice presidential race napapas sa pagpadaylang ni Marcos sa tinuoray niyang dagway nga puno sa kalaksot ug kauhaw ug kahakog sa gahom.
Nipasangil siya og lapad nga pagpanikas sa way pagpakita og bisan unsang ebidensiya. Gikutikuti niyang opisyal nga iskutenyo sa NBOC apan way lipudlipod nga nisabotahe ini pinaagi sa pag-insistir nga unahon ang systems audit sa servers sa Commission on Elections ug pag-organisar sa iyang mga dumadapig sa posibleng people power.
* * *
Salamat sa kahigpit sa vice presidential race, nabisto ang tinuod nga dagway ni Marcos: Giawhag ta niyang kalimtan ang nangagi, labi nang bangis nga pagpangyatak sa tawhanong mga katungod ug pagtilok og kawat sa nasudnong panudlanan atol sa martial law, apan way kukaikog nga nagpahimus sa nagbuntaog nga katigayonan nga natumpi sa iyang mga ginikanan ug sa nahibilin pa nilang mga loyalista pagpalihok sa baskog niyang nasudnong kampanya.
Salamat ni Kongresista Leni Robredo. Iyang kalunsay, kaligdong ug katakos maoy nakabugkos sa nasud ug sa katawhan nga bisan nakatagpilaw unta sa kalang-og ug kaduguon sa ilang kagahapon daling nitimbakuwas aron pagbaraw sa lipot nga pagsakmit pagbalik sa gahom.
- Latest
