EDITORIAL - Nindot nga leksyon

Hingpit na gyud nga gisuspenso sa Department of the Interior and Local Government (DILG) sila si Mayor Michael Rama, Vice Mayor Edgardo Labella ug ang 12 ka konsehal sa dakbayan sa Sugbo.

Lima na lang ka konsehal ang nagtikaw-tikaw nga wala maapil sa pagsuspenso. Kini maoy hinungdan nga gitudlo sa DILG si Konsehal Margarita “Margot” Osmeña nga maoy molingkod isip acting mayor hangtod sa udtong tutok sa Hunyo 30. Natuman gyud ang hagit nga kanunay’ng litokon ni Mayor Rama panahon nga masuko siya ni Margot nga kuno mag-mayor usa ug dili kay magpa mayor-mayor.

Ang susama nga hagit gihimo usab ni Rama ngadto kang Tomas Osmeña. Tuod man, natinuod gyud ug karon, si Tomas na ang umaabot nga mayor sa dakbayan sugod sa udto sa Hunyo 30.

Nakamugna pa ang magtiayong Osmeña og talagsaong kasaysayan diin ang asawa, motugyan ngadto sa iyang bana sa pagdumala dinhi sa dakbayan sa Sugbo.

Dili yano ang kaguol nga gibati ni Rama tungod kay gawas nga siya gipilde og kapin sa 34 mil botos ni Osmeña sa miaging eleksyon, gisuspenso pa gyud siya sa Malacañang pinaagi sa DILG.

Sayop gyud ang paghatag og tag P20 mil nga “calamity financial assistance” ngadto sa mga opisyal ug kawani sa City Hall kaniadtong 2013 kay ang gipanghatagan wala man gyud mabiktima sa linog ug sa bagyong Yolanda.

Bisan si Mayor Rama miangkon nga ang nadawat niya nga calamity assistance gibayad ra niya sa bill niya sa tubig ug kuryente. Ang tinuod, ang maong kantidad alang gayud kadto sa bonus.

Apan tungod sa kadako sa kantidad, manubra na sa gitugot nga budget alang sa sweldo ug allowances sa mga kawani ug posible nga dili na usab itugot sa Department of  Budget and Management.

Karon, naleksyon ang mga hingtungdang opisyal.