Cash assistance

Gumikan sa mga kakulian ug inconveniences human sa eleksyon kaniadtong Lunes, wala mahinayon ang paghatag sa financial assistance sa mga senior citizens sa miaging Miyerkules.

Apan ang pagpanghatag pagahimoon na gayud karong adlawa diha sa naandan nga mga venue sa mga barangay, sumala ni Doming Chaves nga maoy pangulo sa Office of Senior Citizens Affairs.

Matag senior citizen hatagan og tag P1,000. Atong nadunggan nga adunay mga laraw pag-usbaw sa financial assistance sa mga senior citizens.

Nindot kun mahinayon. Apan, giingon nga dili cash ang usbaw, kun dili, in kind. Sa ato pa, i-maximize ang mga serbisyo aron kahatagan og dugang assistance  ang mas nagkinahanglan, sama sa mga masakiton, mga abandoned o gipasagdan nga mga senior citizens, ug mga indigent o wala nay kahinguhaan.

Kun pila man ang ihatag nga usbaw, daghan ang mga serbisyo nga atong mapahimuslan. Sama pananglitan sa pag-establish sa geriatric ward sulod sa mga tambalanan sa gobiyerno.

Labing seguro daghan ang mga makapahimulos niini, nga kun cash ang ipanghatag, daghang senior citizens nga naghambin og mga kakulian sa panglawas ang kahikawan ning maong kahigayonan.

Dugang niini, mahimo nga magamit ang dugang assistance pagpabarug sa Cebu City Senior Citizens Center, gawas niadtong wala pa mahuman nga center sa SRP.

Layo kaayo to alang kanatong mga senior citizens, tuyoon kaayo.

Maoy hinungdan nga importante kaayo ni alang kanato nga senior citizens nga accessible kaayo ang center, diin among others, mahimo usab nga opisina sa OSCA Head.

Ang magasto unya sa mga medical services, consultation, pagpatambal, ug hospitalization, atong makuha gikan sa gilaraw nga usbaw sa financial assistance.

Ingon man, atong magamit ang maong usbaw pagtukod og mga home for the abandoned senior citizens. Kini ug daghan pa nga serbisyo ug mga pribiliheyo nga atong kapahimuslan unya kun madayon kining gilaraw nga usbaw, dili cash, kun dili, in kind.

Laing mga laraw nga atong nadunggan mao ang paghiusa sa nagkatibulaag ug nag-iyahay nga mga chapter associations sa mga senior citizens sa dakbayan. Gani, nabiktima kita niining giingon nga ang politika divisive kaayo. Mao kini ang nahitabo sa miaging eleksyon.

Panahon na sa pag-uliay sa mga maayong kabubut-on, ilabina kanatong mga senior citizens. Ngano nga ato mang ipabilin sa atong galamhan ang mga kayugot ug kahiubos nga atong gihambin sa miaging eleksyon?

Hinaut nga kining maong mga laraw mahinayon gayud, aron sa ato na nga giingon, makapahimulos ang mga senior citizens nga mas nagkinahanglan sa tabang, sama sa mga indigent senior citizens.