Hapit na gyud!

Mayo 9, Judgment Day kun kinsa ang sangonan sa lungsod nga mamunoan sa nasudnon ug sa lokal nga pangagamhanan. Sa ato na nga giingon dinhi, wala na’y hustong kinatulgan ang mga pilionon.

Nagbutobuto na ang dughan, ug lagmit gidoble ang kainit sa pag-ampo nga unta buligan sila sa Kahitas-an aron maangkon ang kadaogan.

Pastilan, nganong ila man gyud ning gituyoan! Of course dako ang atong kalipay nga daghan kaayo sa atong kaigsuonan nga buot moalagad sa lungsod. Mga bayani kini sila, kay dili lalim ang pagkasulogoon sa lungsod, ang pagka-public servant. Kanilang tanan, congratulations. Imagine, usa ka dakong pag-antos, ang pagkakandidato aron ma-public servant, dako og gasto ug makaapektar pa sa panglawas. Anyway, good luck kanilang tanan.

Ug kanatong pumipili, atong sublion ang awhag to vote wisely, vote responsibly. Ayaw ibase ang inyong pagbotar sa hunahuna sa uban, hatagi og higayon nga mo-work ang imong konsiyensya. Ayaw iagad sa resulta sa mga survey ang imong pagbotar.

Otherwise, kun ang mga survey maoy atong tuohan, dili na lang ta mag-election. Ato na lang i-install si Mayor Digong Duterte pagka-presidente, ug pilion nga senate president si Manny Pacquiao.

At any rate, ato na usab ipahinumdom, nga ikaw lungsod ang magbuot kun unsa nga matang sa ugma ang imong ipatagamtam sa atong nasud. Ikaw ang magbuot kun unsay dangatan sa atong nasud. Ingon niini ikaw ka gamhanan. I-exercise pag-ayo ang imong pagka-haring lungsod. May duha ka semana ka pa sa pagpamalandong.

* * *

Sa wala pa  magsugod ang opisyal nga campaign period, ang Anti-Illegal Drug Operations Task Force (AIDSOTF) mipalanog sa kabalaka nga ang mga kandidato mogamit sa drug money sa ilang pangampanya.

Kini, gumikan sa ilang nakita nga nagkadaghan ang mga opisyal sa gobiyerno nga nadakpan, gumikan sa drug-related offenses. Ug matud ni Chief Inspector Roque Merdegia nga maoy tigpamaba sa AIDSOTF, ang uban niining maong dakpan, “admitted to be raising funds for the 2016 elections.”

Kuyaw og natinuod ang maong mga kabalaka. Mahal na kaayo ang mga political advertisements karon sama sa mga tarpaulin, radio-TV ug newspaper ads, mga programa sa radio-ug TV, ug binayran nga mga barker ug mga blocktimer.

Unya, ang ilang pagpangampanya personal, paglibut-libot sa kasuokan sa lungsod o sa dakbayan, pagsuroysuroy sa tibuok nasud sa mga national candidates, ug pag-finance sa tagsataga nila ka organization nga mopalakaw sa kampanya.

Daku kaayo ni og gasto. Wa kahay drug money nga nahilambigit niini?