EDITORYAL - P.50 lalisan na pud

Nagkaanam og kabarato ang presyo sa lana ug karon ang Land Transportation Franchising and Regulatory Board mimando sa pagpaus-os sa pletihan gikan sa P7 himuon na lang nga P6.50 ang minimum nga pletihan.

Kining bag-ong pletihan makaayo alang sa mga pasahero ilabi na kadtong makadaghang higayon mosakay padung ug balik gikan sa ilaha ngadto sa ilang destinasyon matag adlaw.

Apan kinahanglan nga pahugtan gyud sa LTFRB ug sa mga otoridad kun tinud-anay ba gyung nituman ang mga drayber sa mga pasaheroan.

Kini tungod kay bisan sa wala pa kining bag-ong kamandoan nga paghimong P6.50 sa pleti, wala man gihapon motuman ang mga drayber sa P7 dihang una kining gipatuman gikan sa P8.

Ang mga pasahero nga dili gusto og lalis ilabi na niadtong mga nagdali dili na lang usahay makatingog kay lagi paugatan man sila sa mga drayber ug sa konduktor.

Kani ra bang mga drayber ug konduktor pag-ingon gani nga adunay pagsaka sa presyo sa pletihan abtik dayon kaayong maningil bisan wala pa silay taripa, apan kun pagkunhod gani  sa pletihan hunit pa kaayo sila sa panit sa buaya, mangasuko pa ug miinsister nga wa pay taripa.

Angay unta sa mga drayber ug konduktor nga maluoy sa mga pasahero kay mao kini ang nagbuhi kanila. Kining ubang pasahero nga gusto gyung mokuha sa ilang sukli nga P.50 sa pletihan mahimo mang makareklamo batok sa drayber. Apan ang mga drayber posible pud nga di mosugot nga P6 na lang ang pleti kay alkanse sila.

Kun kaniadto ilabay-labay lang ang P.25 sentimos karon magamit na kini pag-usab. Pagdala na lang daan niini kay siguro gyud ni nga aduna na say maglalis ani nga pasahero ug drayber.