Zika Virus

Gikaalarma karon sa World Health Organization (WHO) ang paspas nga pagkatap sa Zika Virus.

Ang Zika Virus naggikan sa pamilya sa lamok nga Aedes, sama sa Aedes aegypti nga maoy nagdala sa kagaw sa dengue, mopaak usab kini sa adlawan.

Ang maong virus gikan sa unggoy nga gitawag og Rhesus macaque. Giila kining maong matang sa unggoy nga usa sa labing karaang species sa mga unggoy nga dunay lapad nga populasyon gikan sa South, Central ug Southeast Asia.

Unang nakuha ang virus gikan sa maong unggoy niadtong 1947 didto sa Zika Forest sa Uganda duol sa Lake Victoria. Gikonsiderar nga naa na sa pandemic level kining maong matang sa sakit ug angay na nga ikaalarma tungod sa kapaspas ug kalapad na sa mga tawo nga naapektahan sa daghang bahin sa kalibotan.

Sa labing bag-ong report sa WHO, ang dunay labing daghang kaso sa Zika Virus naa karon sa South America. Apan kining maong matang sa virus, mapasa usab ngadto sa laing tawo gawas sa paak sa lamok, pinaagi sa sexual contact.

Una nga nakompirmar ang sexual transmission sa Zika Virus niadtong 2009, gikan sa usa ka biologist nga si Brian Foy sa Colorado State University. Iya kining napasa ngadto sa iyang asawa. Nakuha ni Foy ang virus sa iyang pagbisita sa Senegal sa iyang pagtuon sa mga lamok.

Iya kining napasa ngadto sa iyang asawa sa iyang pagbalik sa Amerika. Ang iyang asawa nga nataptan sa Virus nipakita og subra ka sensitibo sa kahayag.

Sa report sa CNN karong tuiga may lain na usab nga kaso sa Zika Virus nga nikatap pinaagi sa pagpakighilawas didto sa Texas. Tungod niini, gidasig sa CDC, kon Center for Disease Control and Prevention, ang mga sexual partner sa paggamit gyud og condom aron dili mapasa ngadto sa mga babaye ang virus.

Gikahadlokan sa WHO nga moabot sa 3-4 ka milyon ka Amerikano sunod tuig ang mataptan sa Zika Virus nga nikatap na karon sa 24 ka nasud tibuok kalibutan.

Ang labing gikabalak-an sa WHO mao ang mga babaye nga magsabak tungod kay mapasa ngadto sa ilang anak ang virus nga moresulta sa microcephaly. Ang microcephaly mao ang wala hingpit nga pagtubo sa ulo sa bata ug sa iyang utok nga mosangpot sa kamatayon.

Ang mga simtomas sa Zika Virus, sama sa dengue nga mao ang hilanat, rashes, pagpamuypoy sa lawas. Wala pay bakuna o tambal sa maong sakit gawas lang sa pagpahuway.

Kun magrabehan ang pasyente posible ang laing nuerological complication nga Guillain–Barré syndrome nga mosangpot sab og kamatayon.