Foreign direct investments

Unsa man ning Foreign direct investments kon FDI? Literally, nagpasabot sa pagsulod o pagbubo og capital gikan sa mga langyaw.

Mga salapi nga pangnegosyo gikan sa mga langyaw nga magpapatigayon nga anhi mamatigayon sa atong nasud nga molungtad sa dugay’ng panahon, o permanente nga pag-settle down dinhi sa atong nasud, kun kining ilang giingon nga long-horizon investment activities dinhi sa atong nasud.

Ang Bangko Sentral ng Piipinas (BSP) mibutyag nga ang FDI milapas na og $480 million sa target sa gobiyerno nga $4.4 billion kay mikabat na og $4.88 billion sulod lang sa unang siyam ka bulan sa miaging tuig.

Naghulagway kini sa confidence o pagsalig sa international community nganhi sa atong nasud. Ilang nakita ang atong paningkamot sa pagpalambo sa ekonomiya pinaagi sa pagsanta sa naghitak nga corruption sa nangaging katuigan.

Ang mga bag-o nga investments nagagikan sa America, Singapore, Taiwan, Japan, ug Germany, ug gibubo sa pamatigayon sa manufacturing, real estate (napiksan ang Sugbo niini), wholesale and retail trade, financial and insurance, ug transportation and storage sectors.

Matud dinhi, “FDI are investments placed by non-residents into the country in search for long term prospects.”

Dugang niini, ang British government mitumbok sa atong nasud nga usa sa 36 ka nasud nga giisip nga “emerging power” kun ekonomiya ang hisgotan.

Gumikan niini, naglaraw ang kagamhanan sa Britania pagbubo og dugang capital nganhi sa atong nasud, lakip na dinhi sa Sugbo.

Gumikan ning maong tinguha pagpalambo sa ilang ekonomiya dinhi sa atong nasud, nagpulipuli ang mga opisyal sa Britania pagduaw sa atong nasud alang ning maong katuyoan sa pamatigayon.

Ug … ang First Metro Investment Corporation (FMIC), ang investment banking arm sa Metrobank Group, mipasaka, mi-upgrade sa ilang economic growth forecast sa atong nasud, gikan sa 7.0 – 7.5 percent ngadto sa 7.5 – 8.0 percent.

Si Roberto Juanchito Dispo, FMIC president, namahayag nga ang pag-us-os sa presyo sa lana ug ang umaabot nga election spending (nga karon nagpadayon na), maoy maka-trigger sa pagpalambo sa atong ekonomiya.

Sa iyang bahin, si Fabian Dee, president sa Metrobank, namahayag nga “generally, investors are very bullish on our country.

The Philippines is just starting a journey where we will be seeing a very sustainable and explosive growth. We can already see all these foreign retailers coming here because I think everyone has that perception.”

So, ang pagsalig sa international community nganhi sa atong nasud … kinahanglan magpadayon kini. Ug kinsa man ang makapadayon niini? Si Poe? Duterte? Binay? O si Roxas?

Ikaw, lungsod ang makatubag ning maong pangutana!