EDITORYAL - Rama ug Osmeña

Kauban sila sa politika kaniadto apan karon higpit na nga kontra ug nag-ilog sa gahum kun kinsa kanilang duha ang labing gamhanan ug maoy makadumala sa dakbayan sa Sugbo.

Managsama silang duha nga adunay mga katakus ug abilidad ingon man susama sila og tumong nga makaserbisyo sa katawhan.

Kun si Rama magliku-liko ang sinultihan ug dugay’ng makapasabot sa punto nga gusto niyang ipasabot, si Osmeña pintok nga mopasabot sa gusto niyang buhaton.

Managlahi ang ilang pagkatawo kay samtang si Rama masayon-sayon ra nga duolon ug agbayan sa iyang mga amigo, si Osmeña ingon sa mug-oton og panagway ug katahaan.

Apan alang sa nagpakaila kanilang duha, pareho sila si Osmeña ug Rama nga mga maayo og batasan. Ang nakaapan lang kay nagkabuwag na ang masi’g nila ka mga dalan nga gisubay.

Ang eleksyon kaniadtong 2013, nagbilin og kasakitan kang Osmeña diha nga gipilde siya ni Rama pagka mayor. Ikaduha na kini nga higayon nga magsangka sila pag-usab karong Mayo 9.

Pareho sila nga mga lig-ong kandidato pagka mayor dinhi sa dakbayan kay mga gamhanan usab nga politikanhong grupo ang ilang gisandigan.

Pundok ni Vice President Binay maoy gisandigan ni Rama, samtang ang Liberal Party ni Presidente Aquino usab ang nag-agak kang Osmeña.

Kun may daghang dumadapig ang Team Rama nga mosuporta ni Rama, daghan usab ang mga supporters sa Bando Osmeña Pundok-Kauswagan (BOPK) nga mopaluyo ni Osmeña.

Adunay mga tawo nga nangandoy nga moabot ra ang higayon nga sila si Osmeña ug Rama magkauli pagbalik, apan kini gitan-aw sa uban nga makuli pa nga mahitabo samtang wala’y usa kanila nga moduko sa iyang garbo ug andam magpaubos.