Cardinal Tagle

"Kun ang inyong parokya adunay luag nga parking apan wala’y lawak alang sa pastoral formations, unsa man ang matang sa kultura sa inyong parokya? Tan-awa kun giunsa nato paghan-ay ang mga tawo? (sa IEC Pavilion), Kita nga mga obispo ania sa atubangan samtang ang uban anaa sa luyo."

Kini ang hait nga labtik ni Manila Arcbishop Louis Antonio Cardinal Tagle ngadto sa iyang mga kauban sa simbahan atol sa lecture sa International Eucharistic Congress diin gipanghimug-atan niya ang kultura ug Eukaristiya.

Sakit alang sa mga naigo, apan wala sila’y mahimo kay tinuod man, busa gamiton unta nila ang kasakit sa labtik aron pag-usab sa maot nga sistema nga ilang naandan ug mosubay na kun unsa ang buot mahitabo sa Santo Papa nga mas mopaduol ug makiglambigit sa mga tawo ilabi na sa mga kabus.

Atol sa inauguration sa Eukaristiya Garden samtang naglingkod ang mga sakop sa media sa lamesa, usa ka babaye nga in-charge sa event ang miingon nga para lang sa mga obispo ang lamesa. Ang nahitabo nagbarug ang mga tigbalita kay wala man tanyagi og dapit nga makalingkod.

Sa opening mass sa Plaza Independencia kaniadtong Enero 24, mihangyo ang akong asawa ug anak nga mogamit sa CR sa Fort San Pedro apan gibalibaran kay ang mga obispo lang kuno ang puwede makagamit.

Wala na lang nila ikonsiderar ang usa ka inahan nga nagkugos sa bata tungod kay usa ra man ka yano'ng tawo. Unsa, ang mga obispo lang ba ang mobati sa sugo sa lawas?

Unta motuhop na sa kasingkasing ang kalooy ug kaaghop sa mga tawo aron hingpit nga mabatnan ang emotional ug cultural intelligence aron masabtan ang tinuod nga panginahanglan sa uban, ilabi na kadtong mas nagkinahanglan.

Bravo Cardinal Tagle!