Pulos wa magdahom
Way kahigayonan nga manginlabot ang Vatican sa panagsungi sa pagpanag-iya sa Spartly Islands nga giilogan sa Pilipinas, China ug ubang kanasuran. Mao ni gitataw sa Bol-anon nga embahador sa Vatican sa United Nations (UN) nga si Arsobispo Bernardito Cleopas Auza dihang amo siyang nahinabi dayong tapos sa 51st International Eucharistic Congress (IEC).
Nipasabot si Auza nga manginlabot lang si Pope Francis og panagsungi kun hangyuon ang Vatican sa tanang nagkasungi nga mga nasud. Samtang hapit tanang nasud nga may problema ganahang magpatabang sa Vatican, salamat sa talagsaong popularidad sa Santo Papa, wa igdungog ang China nga magdadayeg sa Vatican, gawas nga ganahan nga direktang makigsulti sa Pilipinas.
* * *
Maglisod pagpasabot si Auza nganong ang lumad nga taga Balintawak, Talibon, Bohol nahimuntog sa labing dakong wanang sa diplomasya nga nagrepresentar di sa iyang nasud kon dili sa usa sa labing tinahud nga lider sa kalibotan sa bag-ong panahon.
Ganahan unta siyang mahimong magtutudlo. Wa damha nga mahimong embahador sa Vatican sa nagkalainlaing kanasuran sama sa Madagascar, Bulgaria, Albania, Haiti ug Organization of American States (OAS). Nikumpisal si Auza nga ang dakong impluwensiya ni Pope Francis nakahimo sa iyang trabaho sa UN nga labing sayon ug labing lisod sa 26 ka tuig na niyang paghupot og mahinungdanong mga katungdanan sa kalibotan sa diplomasya.
* * *
Wa sab magdahom sa iyang nahimutangan si Msgr. Joseph Tan. Nga isip tigpamaba sa Artsidyosesis sa Sugbo maoy nagduma sa kalibotanong media coverage sa IEC sa Sugbo nga pormal nang gitapos sa Statio Orbis sa South Road Properties (SRP) gahapon.
Nakugang si Tan dihang gitudlo ni Cebu Archbishop Emeritus Ricardo Kardinal Vidal nga mamahandi sa artsidyosesis. Dihang niretiro si Vidal nakakita si Tan og kahigayonan sa pagpangita og mas ganahan niyang gimbuhaton. Maayo na lang nga gitugotan siyang Cebu Archbishop Jose Palma nga makaeskuyla sa Roma.
* * *
Nagpalista si Tan sa bugtong bakanteng scholarship slot sa Opus Dei sa Social Communication. Nabalaka hinuon sa iyang katakos dihang nahibaw-an nga ang iyang kaubanan pulos tagduma og TV ug radio networks. Siya ray way kasinatian sa media. Gawas nga nakalahutay gigantihan pa kay dayong tapos sa kurso gitudlo siyang Palma nga media liaison officer.
Sa IEC Pavilion, gilibot ni Tan ang kadagkoan sa Opus Dei sa mga lawak sa kalibotanong media organizations pagpakita diin padung ang minilyon ka euro nga ilang nagasto sa iyang scholarship. May laing gikumpisal si Tan: Usa sa rason nganong wa ibalhin ang Statio Orbis, bisan sa pasidaan sa PAGASA sa uwan, mao nga napahimutang nang minilyon ka pesos nga balor sa sistema sa telekomunikasyon ug internet sa SRP ug uwahi nang ibalhin sa ubang luna. Nga nagmatuod nga nahibawo si Tan sa iyang gihimo.
* * *
- Latest
