EDITORYAL - Pagtulon-an sa IEC

Mga usa ka milyon ka tawo ang giingong mitambong sa gipahigayong Statio Orbis, kon panapos nga Santos nga Misa sa International Eucharistic Congress nga didto sa South Road Properties (SRP) gihimo kagahapon.

Apan bisan pa sa maong gidaghanon sa mga tawo nga mitambong sa Statio Orbis, ang labing dakong kabahin sa dakbayan sa Sugbo wala gayud makasinati og grabeng problema sa trapiko, gawas lang didto na dapit sa SRP.

Dili sama sa matag higayon nga ang dakbayan sa Sugbo magpasiugda og Sinulog Grand Parade subay sa mga dagkong karsada dinhi sa dakbayan nga gubot kaayo ang atong siyudad tungod sa kagrabe sa trapik.

Angay tingali nga ang atong kasinatian sa pagpahigayon sa Statio Orbis kuhaan og pagtulon-an sa atong mga opisyal sa dakbayan sa Sugbo, ug sa Sinulog Foundation Inc., aron sa sunod nga pagpahigayon sa Sinulog Grand Parade adto usab kini himoa sa SRP.

Kapin pa sa 100 ka hektareya nga kayutaan sa SRP nga wala pa mabaligya sa dakbayan ug mahimo nga anha niining dapita maghimo og dakong grandstand nga kapahimutangan og 30 mil ka tumatan-aw.

Kun himoon kini sa mga opisyal sa dakbayan sa Sugbo, mahimong dili kaayo masinati ang sama nga kaguliyang sa trapiko dinhi sa kadalanan sa siyudad.

Dako pa gyud kaayo nga lugar nga mahimong kaparkingan sa mga sakyanan niadtong gusto nga motan-aw sa kalihukan. Lapad usab kaayo ang karsada sa SRP nga mahimong adto mohimo og street dancing ang mga contingents.

Kana kun ang mga opisyal sa dakbayan sa Sugbo nagtinguha nga medyo hapsay ang atong siyudad atol sa kalihukan sa Sinulog kay dili na man pangsirhan ang mga karsada.