EDITORYAL - Panagsa ra ang IEC

Bulahan kaayo ang mga Sugboanon ug ang mga tawong nidayo gikan pa sa nagkalain-laing suok sa Pilipinas ug sa kalibotan aron sa pagsalmot sa 51st International Eucharistic Congress nga dinhi gihimo sa Sugbo.

Karong adlawa tak-opan na ang maong kalihokan pinaagi sa Statio Orbis, usa ka dakong Santos nga Misa nga anha himuon sa South Road Properties (SRP) sa Cebu City.

Gipaabot nga tambongan og dili momenus usa ka milyon ka mga Romano Katoliko ug kadtong uban nga gusto lang makasuway sa kung unsay ilang eksperiyensya nga makuha sa kalihokan.

Angay kining ikalipay sa mga Sugboanon tungod kay molanat na pud og dul-an 80 ka tuig una pa kini mabalik dinhi sa Pilipinas apan dili siguro kun dinhi pa gihapon himuon sa Sugbo.

Kadtong mga nahasol tungod sa namugnang problema sa trapiko niini nga kalihokan, gamay na lang nga pailob kay mahuman na kini karong adlawa.

Dili kada tuig adunay ingon niini nga kalihokan dinhi sa Sugbo o bisan sa kalibotan tungod kay kada upat ka tuig ra kini mahitabo.

Ang labing unang IEC dinhi sa Asya nahitabo dinhi lang sa Pilipinas niadtong Pebrero 3 hangtud 7 sa tuig 1937 sa panahon ni Pope Pius XI didto sa Manila ug kadto mao ang ika-33 nga IEC sukad nga kini namugna niadtong 1881 sa Lille, France. Paglabay sa 79 ka tuig, nabalik ang IEC dinhi sa Pilipinas ug dinhi sa Sugbo gihimo.

 Ang mga wala pa gipakatawong gimabdos karon wala pay kasigurohan kun makasuway sila sa tibuok nilang kinabuhi og ingon niini nga kasinatian.

Busa kadtong mga wala pa makatambong sa bisan unsang kalihokan sa IEC sa nangaging mga adlaw, angay lang gyud nga gahinan kini og panahon karong adlawa dungan sa pagsimba uban sa tanang miyembro sa inyong pamilya.