Amahan wala na magpadala og suporta

Dear Atty. Divine,

Ang akong bana milarga sa Manila ug tua na didto nagtrabaho since last year. Iya mi nga gibilin sa probinsya, uban sa duha namo ka anak. Nagpadala siya namo og suporta sulod lang sa unom ka buwan gikan sa iyang pagbiya ug human niini wala na mo-communicate kanamo, wala na magpadala og suporta, hinungdan nga napugos ko sa pagpanarbaho ug ang duha namo ka anak gibilin nako sa akong mama. Nagduda ko attorney nga may lain siyang babaye ug ang akong gusto nga mosuporta gyud siya sa among mga anak. Unsa may maayo nako nga buhaton? Daghang salamat.— Genara

 Dear Genara,

Kun duna kay address sa imong bana sa iyang gipuy-an o gitrabahoan sa Manila, mahimo nimo siya nga padad-an og demand letter ug mas maayo nga ang maong demand letter imong ipahimo sa abogado aron dili lang kini ibaliwala sa imong bana. Apan kun dili gyud siya motagad sa imong demand letter, then modangop gyud ka sa korte alang sa imong tinguha pagpangayo kaniya og suporta. Kun imong makunpirmar nga aduna siyay laing babaye ug iya na kining gipuyo, unya makakuha ka og ebidensya niini, mahimo nimo siya nga ikiha og Concubinage ubos sa atong Revised Penal Code. Hinaot nga akong natubag ang imong pangutana. Thanks and God bless. – Atty Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.