Asa na ang hustisya?

Usa ka tuig na ang milabay human sa dugoong hitabo didto sa Mamasapano, Maguindanao diin 44 ka sakop sa Special Action Force sa Philippine National Police ang napatay sa mga sakop sa Moro Islamic Liberation Front ug ubang rebelde’ng grupo sa mga Muslim.

Apan wala pa gihapon makab-ot sa mga pamilya sa SAF 44 ang hustisya. Hangtud karon, padayon pa ang imbestigasyon sa kagamhanan kun unsa gayud ang nahitabo niadtong tungora. Ug mi-resume usab ang Senate inquiry niini.

Sa habig sa kapolisan, usa ka masaker ang nahitabo didto sa Mamasapano. Sama kuno sa nahulog sa lit-ag ang mga sakop sa SAF sa ilang operasyon batok sa nag-unang terorista nga nagtago didto sa Mindanao.

Apan sa habig usab sa MILF, lehitimo kuno nga engkwentro ang nahitabo niadtong tungora. Gibarugan sa mga opisyal niini nga nahitabo ang insidente tungod kay wala nagpahibalo ang mga SAF personnel nga aduna sila’y operasyon sa ilang teritoryo.

Gumikan niini, wala pa gayud masuta sa katawhan ang kamatuoran. Tungod usab sa ka hinay sa dagan sa imbestigasyon, ambot kun kanus-a matino ang tanan. Hinuon, ingon niini gayud ang dagan sa sistema sa hustisya sa nasud.

Sa insidente sa Mamasapano, ang labing dako nga naalaut mao gayud kadtong mga pamilya sa SAF 44. Tungod sa naghanot nga imbestigayon, dulom ang tsansa nga makab-ot nila ang hustisya sa daling panahon.

Hangtud karon, matag adlaw ang pagbangutan sa mga asawa ug anak niadtong mga nangamatay. Ug dili gayud mahuman ang ilang kalbaryo hangtud nga dili nila makab-ot ang hustisya.

Apan dugay ra unta nahuman kining mao nga imbestigasyon kon mipursige pa ang kagamhanan sa pakisusi niini. Hangtud karon, wala pay usa niadtong giingong mimasaker sa SAF 44 ang na-identify ug nataral sa hukmanan.

Usa usab sa nakalangay sa imbestigasyon mao ang ka kulang sa kooperasyon sa mga rebelde’ng Muslim. Gani hugtanong midumili ang MILF pagtahan niadtong mga sakop niini nga nalambigit sa maong insidente.

 Kun agresibo pa lamang unta ang gobiyerno sa lakang niini pagtino sa tinuoray nga nahitabo didto sa Mamasapano, nahatagan na unta og katin-awan ang maong insidente. Apan subo nga palandungon nga nagkulang sa political will ang atong mga opsiyales.