Uwan ug init sa IEC
Ang maayong balita alang sa mga tigpasiugda sa 51st International Congress (IEC) mao nga human sa way hunong nga uwan sukad niadtong Lunes sa hapon hangtod sa Huwebes sa buntag mopakita na pagbalik ang adlaw karong hapon. Kun matinuod, mahinayon ang prosesyon sa batan-ong mga delegado sa IEC gikan sa Lapu-Lapu City paingon sa Mandaue City karong hapon nga di mameligro ang mga delegado nga mangabasa ug mangasakit.
Nakaginhawa og luag ang mga tigpasiugda kinsa nag-andam nang daan og alternatibo: Kun magpadayon ang uwan hangtod karong hapon, kanselahon na lang nila ang “Jericho Walk” ug adto na lang motiwas og tukaw ang youth delegates sud sa Hoops Dome sa Opon.
* * *
Di na sab mahasol sa uwan ang lokal ug langyaw’ng mga delegado sa IEC nga mopahigayon sa Visita Iglesia sugod sa alas-7 karong gabii latas sa dagkong kadalanan nga nagsumpay sa tulo ka parokya sa uptown Cebu City (Capitol Parish, Asilo dela Milagrosa ug Redemptorist Church) ug sa upat ka parokya sa downtown (Metropolitan Cathedral, Basilica Minore del Sto. Niño, D. Jakosalem ug Sacred Heart Church).
Maayo sang balita gikan sa Philippine Atmospheric, Geophysical and Astronomical Services Administration (PAGASA) nga init nang Biyernes ug Sabado. Sa ato pa, di mameligrong mangabasa ang nagkalainlaing kalihokan sa gawas sa duha ka sunudsunod nga adlaw sa kinapusoran sa Dakbayan sa Sugbo.
* * *
Dako ang kahigayonan nga makakita sa buwan ug mga bituon ang mga delegado sa IEC nga mosalmot sa Santos nga Misa sa tugkaran sa Kapitolyo sugod sa alas-4 sa hapon ug dayon sa solemneng prosesyon gikan sa Kapitolyo paingon sa Plaza Independencia latas sa kinatibuk-ang langyab sa Osmeña Blvd.
Di sab mahasol sa uwan ang Santos nga Misa alang sa 5,000 ka bata nga mangalawat sa labing unang higayon sugod sa alas-4 sa hapon sud sa Cebu City Sports Center nga sundan sa pagsubli sa mabulukong sayaw sa mga tinun-an sa mga kolehiyo ug unibersidad atol sa finale sa Sinulog Grand Parade.
* **
Apan mahulga sa pasidaan sa PAGASA nga mobalik ang uwan karong Domingo ang labing dakong kalihokan sa IEC, ang panak-op nga Santos nga Misa nga gitakdang tambongan sa usa ka milyon ka manimbahay sa South Road Properties (SRP). Hangtod sa akong pagsuwat ini, nipahibawo ang mga tigpasiugda nga di sila mag-andam og alternatibo sa SRP.
Napamatud-an sa mga Sugbuanon sa makadaghan nang higayon nga di sila motalaw sa uwan. Makatabang hinuon kun pangandaman nang daan ang kahigayon nga mobundak gyong uwan. Mas sayo mas maayong awhagon nang manimbahay pag-andam sa ilang kapote ug ubang pandong sa uwan ug butas batok sa lapukong anapog nga gi-abuno sa lapad nga wanang sa templete ni San Pedro Calungsod sa SRP.
- Latest
