Wala motagam sa ka-epal

Wala gyud diay motagam si Bise Presidente Jejomar Binay sa nadawat niya nga “boo” sa mga tawo sulod sa Cebu City Sports Center sa dihang gipaila ug gipahatag siya og mensahe ni Mayor Mike Rama ibabaw sa entablado. Mibalik pa gyud si Binay dinhi sa Sugbo atol opening mass sa ika-51 nga International Eucharistic Congress sa Plaza Independencia niadtong Domingo.

Samtang dili angay husgahan si Binay ug iyang anak nga si suspendidong mayor Junjun Binay sa ilang intensiyon pagtambong sa misa, apan karon lang sila aktibo sa mga relihiyosong kalihukan sa Sugbo karon nga kandidato siya pagka-presidente.

Kun seryoso siya sa iyang intensiyon pag-apil sa misa, nganong magbitbit man gyud siya og photographer aron iplastada sa Facebook nga mitabang siya pag-agak sa mga tawo nga mangalawat? Ngano nga magbitbit man gyud siya og media bisan sa misa?

Siyempre, iya gyud nga ipugos iyang kaugalingon dinhi sa Sugbo tungod kay “vote rich” kining maong probinsiya. Ug sa miaging eleksiyon sa 2010, napilde siya dinhi sa Sugbo ni Mar Roxas pagka-bise presidente.

Maayong timan-an ni Binay nga dili bugok ang mga Sugboanon nga nagtuo siyang madala sa iyang pag-apil-apil sa mga relihiyosong kalihukan.

Samtang hangtod karon nagdumili siya pag-atubang sa mga isyu nga iyang giatubang sama sa mga kasong kurapsiyon sa Makati parking building, pagpanag-iya sa Hacienda Binay sa Batangas nga adunay de aircon nga baboyan, lisud ibaligya ni Binay ang iyang kaugalingon ngadto sa mga Sugboanon.

* * *

Duha lang ka butang ang akong nakit-an nganong ipamugos ni Senador Juan Ponce Enrile ang pagduot kang Presidente Noynoy Aquino nga maoy direktang responsable sa operasyon sa Mamasapano, Maguindanao nga miresulta sa kamatayon sa teroristang si Marwan apan mikalas sa kinabuhi sa 44 ka sakop sa PNP Special Action Force.

Una, panimalos kini ni Enrile kang Aquino kay mao kini hinungdan nganong nabilanggo siya tungod sa eskandalo sa pork barrel sa Kongreso nga giliko ngadto sa mga peke nga NGOs ni Janet Lim-Napoles.

Ikaduha, aron mabulahan ang kandidato pagka-presidente sa oposisyon nga si Grace Poe pinaagi sa iyang pagpangulo sa panel nga maoy nag-imbestigar sa insidente sa Mamasapano.

Pero sa akong obserbasyon, wala na mosaler ang impluwensiya ni Enrile. Sa ato pa, wala nay motuo kaniya.

Samtang uyon ko nga utingkayon ang kamatuoran nga naglimin sa Mamasapano aron masayran kinsay angay manubag, apan kun gamiton kini sa pamolitika ug mosamot na hinuon kalubog, mas maayong dili na lang pukawon ang kalag sa mga nangamatay sa insidente.

Lain nakong pangagpas nganong gipamugos gyud kini nilang Enrile ug Poe, aron molabang ang kaso hangtod sa sunod administrasyon ug ilang ipapriso si Aquino. Balos-balos ra gyud.