Pamolitika sa eleksiyon sa senior citizens

Nganong grabe naman nakapanghilabot sila si Mayor Jonas Cortes ug Kongresista Luigi Quisumbing sa kalihukan sa mga senior citizens sa dakbayan sa Mandaue?

Nagubot kagahapon kay gipadalidali gyud sa kampo ni Jonas ang pagpahigayon sa eleksiyon sa mga senior citizens sa tuyo nga mailisan ang mga opisyal sa pederasyon nga tua modapig kang Konsehal Lolypop Ouano-Dizon?

Sumala sa taho nga akong nadawat, gipa-estambayan gyud og mga tawo ni Jonas (sama nilang Romulo Villacruz ug Konsehal Jimmy Lumapas sa Bakilid ug Konsehal Masoy sa Labogon) nga nag-apong gyud aron, matud pa, mang-apud-apod og P300 alang sa mga senior citizens aron seguroon nga adto mobotar kang Romulo Villacruz pagka-presidente aron pulihan ang incumbent nga si Gloria Bareto.

Nagtuo tingali ang kampo ni Jonas nga kun mahulipan ang mga opisyal sa pederasyon sa senior citizen sa Mandaue, makabintaha sa boto si Luigi batok kang Lolypop.

Apan akong pangutana, dili ba hinuon mangasuko kanila ang mga senior citizens kay gihilabtan ang ilang kalihukan ug gipamolitika sila sa kampo ni Jonas ug Luigi? Kamong mga senior citizens sa Mandaue gamita ang inyong konsensiya. Dawata nang tag-P300 nga gipanghatag ug botohi ang anaa sa inyong kasingkasing.

Kay gihilabtan man nilang Jonas ug Luigi ang inyong kalihukan, nasayod na kamo unsay buhaton sa ilang mga kandidato sa pederasyon ug sa eleksyon karong Mayo 9.

* * *

Ang nagkagrabe nga trapiko mugna sa kakulang og opisyal nga makamao sa teknikalidad sa trapiko.

Mao kini akong nakita diha sa Minglanilla ug Talisay. Grabe kaayo kahuot ang trapiko gikan sa Sangi sa Minglanilla lahos na sa Pakigne, Lipata ug lahos na sa Lawaan sa Talisay hangtod sa eskina sa Lawaan paingon sa kinatibuk-ang Cebu South Costal Road. Moluag lang kini ini’g lapas na sa Laray-San Roque junction. Dili ko motuo nga wala makakita niining sitwasyona si Mayor Lani Peña ug Mayor Johnny delos Reyes. Ang akong pagtuo mao nga kulang sila og kahibalo sa teknikalidad sa trapiko hinungdan nga kulang og interes sa pagsulbad niini.

Naabot ko sa Minglanilla niadtong 2009, luag pa kaayo ang trapiko sa Minglanilla ug Talisay. Sa akong na-obserbahan, nagkadugay nagka-abusado ang mga drayber sa multicab ug traysikol, nagdungan ang pagka-abusado sa mga habal-habal drayber ug ang ilang pagdaghan sa bisan asang eskina sa Minglanilla.

Bisan naghuot na ang trapiko, maghuot og estambay sa eskina sa Pakigne ang mga habal-habal unya mangasuko kun badlongon.

Ang balaod nagdili sa mga traysikol sa highway apan wala kini mapatuman, unya ang habal-habal nga gimaneho kasagaran  mga wala’y lisensiya, wala gyud masumpo. Kanus-a man molihok ang lungsod? Unya na ba kun dili na gyud mabangbang ang kahuot sa trapiko ug maisip na ang lungsod nga “inhabitable” o dili na kapuy-an kay ang mga tawo dili na makalihok?