EDITORYAL – Kinsa ang mabasol?

Nakuyapan ang babaye nga mihapla sa karsada kaniadtong Sabado sa buntag human kini nadasmagan samtang naglakaw sa Salinas Drive, Lahug kay ang aseras dili man kaagian tungod sa nagbabag nga mga punoan sa kahoy.

Anaa pa sa aseras ang dagkong punoan sa kahoy kay wala man mohatag og pagtugot ang Department of Environment and Natural Resources (DENR) nga kini maputol o kaha maibot.

Tingali kun ang maong babaye anak pa og opisyal sa DENR, magkara-kara na ang mga opisyal sa maong departamento pag-isyu og permiso sa Department of Public Works and Highways (DPWH) aron makuha na ang mga kahoy.

Ang mga kahoy nahimutang kini kaniadto sa sulod sa kural sa Technical Education Skills Development Authority, apan dihang miuyon ang TESDA nga isibog ang ilang kural aron mahimoan og sidewalk ang maong dapit, ang mga kahoy anaa na sa gawas sa kural.

Apan kun ang TESDA wala pa unta maghinakog sa ilang yuta, nga gidonar ra usab kanila sa Kapitolyo kaniadto, dili unta maproblema ang kagamhanan sa maong mga kahoy kun tulo pa lang ka metros ang pagsibog nila sa ilang kural.

Apan ang kahakog sa yuta maoy nakahatag karon og problema, unya gidugangan pa sa kadagkoan sa DENR nga magpakaaron-ingnon nga sila nagpakabana sa mga kahoy, mao nga dili dayon sila moisyu og mga cutting permit.

Kun tinuod pa nga ang DENR nagpakabana sa pagpamutol og mga kahoy, mitungas unta sila kanunay sa kabukiran ug sa kalungsoran aron makita nila nga ang dagkong punoan sa acasia, mga tugas ug uban pa, gipangpuril lang aron gabason ug himoong balay.

Bisan gani kun ang kahoy naghatag na og peligro ngadto sa katawhan, ang DENR dili gihapon basta-basta nga mohatag og permiso sa pagputol niini aron ipatuo nga sila nagpakabana sa kalikupan.