Brgy Guizo, Mandaue City

Puwerteng ngitngita diri sa Sitio Sta. Cruz panahon sa gabii kay wa gyud butangi og suga gikan sa barangay hall paingon na sa eskina. Maayo unta og mahatagan dayon ni og dinalian nga aksyon.

Brgy Ward 1, Minglanilla, Cebu

Bag-o ang merkado sa among lungsod pero ang mga suga hapit na mahurot og ka punder ug wala lang tagda.

Brgy Cadaruhan, Borbon, Cebu

Wala gyud mi kauyon sa pagpabaya sa mga opisyal diri tungod sa wa pagtiwas pagpasemento sa karsada dapit sa Sitio Montecardo. Lapok na kaayo ang karsada ug lisod agian, labi na kun magsige’g uwan.

Brgy Mancilang, Madridejos, Cebu

Maayo ra man sa pasalig ang mga opisyal namo diri pero wala gyuy gihimong aksyon sa problema bahin sa bati sa karsada paingon sa Brgy. Malbago nga bati kaayo ug daghan na nga nadisgrasya diha.

Brgy Lagtang, Talisay City

Ang akong reklamo bahin ni sa karsada diri sa Tangob City galangay kaayo ang trabaho pagpalapad sa karsada. Maayo unta’g maaksyonan dayon sa gobiyerno kay kaming mga estudyante ang kanunay nga mag-antos.

Brgy Kantakuyan, Tabuelan, Cebu

Maayo unta og mabadlong ang mga batan-on nga mangatang sa mga sakyanan dapit sa gubaon nga karsada kay mangayo’g kuwarta sa mga driver. Naa gihapon sila bisan lawom na ang gabii, magdala’g flashlight, kuyaw na sila nga padasmagan kay makuyawan ang motorista.

Brgy Licos, Danao City

Ang among barangay hall diri biyaan man sa mga opisyal ug mga kawani. Kun naay mangayo’g tabang, way mahimo kay way tawo, bisan og usa na lang unta ang mag-duty.

Brgy Guinacot, Danao City

Diay linya sa tubig diri apan way agas-agas. Lisud tawon mi sa inadlaw namo nga panginahanglan sa tubig. Ang among mayor wala gyud magpakabana niining problemaha.

Brgy Mojon, Talisay City

Diri dapit sa Upper Mojon problema kaayo mi sa sidewalk kay gihimo na man nga displihanan sa usa ka junkshop. Lisud kaayo ang pag-agi sa mga tawo ug wala gyud kabadlong ang among kapitan sa barangay bisan duol ra unta ni sa iyang balay.

Brgy Hagnaya, San Remigio, Cebu

Ireklamo namo kining babaye nga nagbantay sa terminal sa pantalan kay bastos kaayo, way respeto sa mga pasahero. Kun magtan-aw ang mga pasahero og TV samtang nagpaabot sa barko, kalit lang niya nga pagngon bisa’g daghang nagtan-aw sa salida.

Brgy Looc, Lapu-Lapu City

Badlongon unta kining mga tawo nga namaligya’g kaka kilid sa Central Elementary School kay ang bawon sa mga bata adto na paingon nila kay ipalit man og kaka imbes ipalit og makaon.

Brgy Polog, Consolacion, Cebu

Pwerte na gyud nga gubaa sa karsada diri tungod niining mga garbage truck nga kanunay mag-agian diri kada adlaw. Naa pay mangatagak nga basura sa karsada.

Alang sa inyong mga reklamo text lang sa 09062973166