Auriculo therapy (1)

Ang 'Auriculo', usa ni ka gamay nga sistima (microsystem) sa lawas, diha sa atong dalunggan, diin matumbok o makita ang mga 'weak points' o 'meredians' nga maoy mga huyang nga parte sa lawas nato. Gamay lang ang  atong dalunggan, apan gawas nga kini gigamit sa panungog, aduna sab ning dakong kalabtan sa katibuk-an nga kahimsog sa atong panglawas.

Ang 'auriculo therapy', kabahin kini sa kinaraang panambal sa mga intsek, nga ginganlan og TCM (Traditional Chinese Medicine). Mikatap kini sukad pa sa 'stone age' nga panahon, ngadto sa Egypt, sa Rome ug sa tanang lugar sa medeterranian. Hangtud nalukop sa kalibutan sa atong bag-ong panahon.

Una ning naila sa tuig 1950 didto sa Pransya, nga si Dr Paul Nogier, usa ka pranses nga neurologist, giila nga mao'y 'Father of Auriculo', o sa 'Modern Ear Acupuncture',  nga maoy nipalambo pag-ayo niini sa atong 'modern science'.

Bisan aduna'y wa pa kaayo'y masabti sa 'science' o 'methodology' niini, apan daghan nang mga eksperto o sayantista ug 'medical practitioners' ang kombinsido na nga nisagop ining 'auriculo therapy'. Nga gikombinar paggamit sa panambal isip epektibo nga pang-alibyo o 'best alternative natural medicine'.

Sa mga therapist, paborito nila ang paghikap o pagpislit sa dalunggan, kun mo-diagnose ug mag-treatment diha mismo dapita, diin tandogon lang ang depektoso nga 'meridian points' sa tanang parte sa mga sistima sa lawas nato.

Wa kaayo sila mogamit sa 'digital sensor' nga sagad gigamit sa doctor, kay ila gayud kuno masentido ang kahimtang sa gipamati sa pasyente, kun  tudlo maoy ilang gamiton, matultolan dayon ang wa na mogana nga parte sa lawas.

Lawom kaayo tugkaron ang kahibalo ini apan may tsansa nga makamao kita,  kay may 'Foundation' nga moabag sa pagtudlo sa mga seryoso nga makakat-on.