Viva, Pit Senyor!

Malipayon ug Balaanon nga kapistahan Señor Sto. Niño!  Viva, Señor Sto. Niño!

Kini ang mas sibaw nga siyagit karong adlawa sa ika-451st nga kapistahan ni Señor Sto. Niño sukad nahimong Kristiyanos ang mga Sugbuanon niadtong 1521.

Kada hinangat sa kapistahan ni Santo Niño dili na ikalalis ang hugot nga debosyon sa mga Sugbuanon ug sa mga deboto ngadto sa Balaang Bata.

Dili nila igsapayan ang kainit, bisan ang pag-uwan-uwan mapadayag lang ug mapadangat sa mga deboto ngadto sa Balaang Bata ang ilang mga pasalamat ug mga pangilaba nga unta dunggon ug sila kaloy-an.

Niadtong Biyernes lang sa Misa de Traslacion, makapanlimbawot sa balhibo ang bagang duot sa mga deboto ni Sto. Niño nga niwara-wara sa ilang bitbit nga mga imahen sa batang Hesus sa pagkanta sa Gosos.

May nagkalain-laing hitsura sa imahen ni Sto. Niño. May Sto. Niño nga nagsul-ob og green, yellow, puwa, may kulong og buhok, may mapahiyumon, may gamay, dako, nagdala og kalibutan ug daghan pa.

Ang nagkalain-laing hulagway sa Sto. Niño nagsimbolo ug nagpadayag sa klase sa emosyon ug pagtuo sa usa ka deboto ngadto sa batang Hesus.

Matag kaway sa ilang mga kamot sa pangilaba ang uban dili makapugong sa paghilak. May mga luha nga mokalit sa paglugmaw sa mga mata. Ang uban mokalit sa pagbakho.

Siguro naghambin sila og bug-at nga mga problema nga diha nila gawasnon nga mapadayag sa pagkanta sa Gosos, ilabi na sa chorus nga "kanamo maluoy Ka unta, nga Kanimo nangilaba."

Bisan sa kamubo sa maong parapo apan bug-at ang epekto niini ngadto sa usa'g-usa nga may iya-iyang intensyon ug isyu nga gipadangat  ngadto sa milagrosong bata.

May mga masakiton nga bisan kun maglisod na sa paglakaw mosakripisyo tungod sa hugot nga pagtuo nga mamilagrohan. May mga senior citizen nga bisan sa kahinay ug magsusapinday na sa paglakaw mokuliot gihapon sa bagang duot sa mga nanimba.

Ang uban dili dayon manguli bisan humana ang Misa tungod kay maghuwat pa nga mabisibisan sa balaang tubig nga iwisik-wisik sa mga lay minister ug kaparian.

Duna say pipila nga dili makontento, kinahanglan gyud sila nga mabasa sa holy water.

Gisaway man kini nga matang sa pagpadayag sa pagtuo nga salikwaot, baligho ug haguka apan dili kini igsapayan alang sa kaliboan ug minilyon nga nagtuo sa kamilagroso ug pagkamaloloy-on sa Batang Hesus.

Base lang sa tema sa kapistahan karong tuiga, "Sto Niño: Wellspring of Mercy and Compassion". Viva! Señor Santo Niño!