Pit Senyor!

Fiesta Señor na usab ug liboan ka langyaw ug lokal nga mga turista ang ania karon sa dakbayan sa Sugbo aron pagsaksi sa nagkalain-laing kalihokan. Usa na niini ang engrande ug inila na nga Sinulog Festival karong adlawa.

Ang Sinulog, usa sa dako nga kalihokan sa kasaulogan sa tinuig nga fiesta, maoy usa sa labing dako nga festival sa nasud. Gani ginganlan kini sa Department of  Tourism isip “mother of all festivals” sa Pilipinas.

Sukad sa pagkahimugso niini niadtong dekada otsiyenta, dako na ang kalamboan sa Sinulog. Gani nahimo na kining labing dako nga atraksiyon sa turismo sa dakbayan tungod kay modani man kini og liboan ka mga bisita.

Una akong misaksi sa Sinulog kaniadtong 1991, sa dihang miduaw ko sa akong magulang nga nia nagtrabaho sa Sugbo. Tungod kay wala’y sama niini nga kalihokan didto sa among probinsiya sa Zamboanga del Sur, usa ko sa na-amazed sa bagang duot sa katawhan nga miduyog sa mao nga kalihokan.

Ug sa nakalabay nga 25 ka tuig, wala’y puas ang kalamboan sa Sinulog. Matag tuig, nagkadako ang maong festival tungod usab sa pagsulbong sa komersiyalisasyon niini nga misagol na sa debosyon sa mga partisipante ug bisita.

Karong panahona, dili na malangkat ang komersiyalisasyon sa Sinulog. Dili ikalimod nga tungod sa aspeto sa negosyo, tulin usab ang paglupad sa popularidad niini dili lamang sa nasud kondili sa tibuok kalibotan.

Tungod sa paggakos niini sa komersiyalismo, nahisama sa dakong magnet ang Sinulog paghakot og gatusan ka libo ka mga turista ug partisipante. Ug dako kini nga tabang sa sektor sa turismo dili lamang sa dakbayan kondili sa tibuok lalawigan sa Sugbo.

Bisan pa man niini, mibati usab og dako nga kahingawa ang kadagkoan sa simbahan. Nabalaka sila nga basin kun sa dili madugay, mawala na ang relihiyosong importansiya sa Sinulog tungod sa grabe nga komersiyalisasyon niini.

Apan dili gayud malikayan ang pagsagol sa negosyo. Dawaton na lamang sa simbahan ang kamatuoran nga kun mohunong ang suporta gikan sa sektor sa patigayon, sigurado nga mawad-an gayud sa umoy ang maong  kalihokan. Pit Senyor!