Mga atraso sa SSS
Pulos may atraso silang Presidente Noynoy Aquino ug ang mga sakop sa Kongreso sa pagkabasura sa kontrobersiyal nga balaudnon nga nihatag og kuridas nga P2,000 nga uminto sa binuwan nga pension sa retiradong mga sakop sa Social Security System (SSS):
Gipasar sa mayoriya sa mga senador ug mga kongresista ang balaudnon bisan sa pasidaan sa kadagkoan sa SSS nga mosangpot sa pagkabangkarota sa pundo; ug
Gipasagdan lang sa Malakanyang ang pagpasar sa balaudnon sa way pagtanyag sa mga senador ug mga kongresista og mas makiangayon nga mga alternatibo--nga mopausbaw sa kinagamyan nga pension apan sa samang higayon mopreserbar sa lahutay sa retirement fund.
* **
Mas daghan og atraso ang kadagkoan sa SSS:
Di tawhanon ang ilang paglansang sa P1,200 sa minimum nga pension nga di na paigo bisan sa pagpalit na lang sa labing batakan nga mga panginahanglan sa pagkaon ug tambal;
Napakyas sila pag-usab sa karaan nang mga lagda sa pagtakda og unipormado nga tampo ug retirement packages bisan sa dagko nang kausaban sa ang-ang sa mga suholan sa mga trabahante ug sa mga tinubdan sa kita sa mga nagnegosyo; ug
Labaw’ng napakyas sa paggamit sa dakong pundo sa SSS alang sa mga kahigayonan sa patigayon nga mamunga og mas dakong ginansiya nga mosangpot unta sa mas dagkong pension ug mga benepisyo sa mga sakop.
* * *
Kun wa pa lang unta hatagi og mas dakong importansiya sa mga sakop sa Kongreso ang ilang politikanhong mga interes pagpahumot sa umaabot nga piniliay sa Mayo ug kun tinuod pa lang untang nagpakabana ang SSS ug Malakanyang alang sa aktibo ug retiradong mga sakop, nagtinabangay unta sila pagpanday og balaudnon nga:
Mopausbaw sa binuwan nga madawat sa mga nag-pension lang og P5,000 paubos nga maoy labing nagkinahanglan og dinalian nga tabang; ug
Mosalikway sa kuridas nga uminto nga klarong pamolitika, gamay ra kaayo alang sa mga tinuod nga nagkinahanglan og uminto, gawas nga wa kinahanglana sa mas dagko og pension.
* * *
Ang nabulilyaso nga pagsuway pagpausbaw sa pension sa SSS maoy makauuwaw nga pasundayag sa mga institusyon nga gitahasan unta sa pagpanalipod ug pagpalambo sa interes sa katawhan:
Kongreso nga mas ganahan nga mamostura kay sa pagtuon unsa man gyod ang labing tukma nga kausaban nga kinahanglang ipatuman sa sistema di lang sa SSS kun dili hasta na sa Government Service Insurance System (GSIS);
Malakanyang nga inay manudlo og mas takos nga mga tagduma sa SSS ug GSIS igo lang nipahimutang sa ilang mga alyado o mga rekomendado sa ilang mga suod; ug
SSS nga igo lang nipadayon sa unsay naandan bisan napamatud-an nga di na haom sa lahi ug mas dagkong panginahanglan sa aktibo ug retiradong mga sakop.
- Latest
