Brgy Tabunok, Tabuelan, Cebu
“Ang mga BHW ug mga tanod diri sa among barangay hangtod karon wala pa man makadawat sa ilang mga bonus. Luoy kaayo mi kay wala gyud tawon nakapamasko, asa na man diay ang budget sa gobiyerno?”
Brgy Mancilang, Madridejos, Cebu
“Bati na gyud kaayo ang karsada paingon diri sa among lugar nga aspaltado man unta ni, pero daghan na kaayo mga lubak-lubak. Kuyaw na kaayo sa mga mabdos nga mosakay sa mga sakyanan kay basin maahat intawon sa pagpanganak.”
Brgy Canamucan, Compostela, Cebu
“Problema gyud mi diri sa tubig. Pait kaayo ang among kahimtang kay pila na ka tuig ni namo nga gisigehan og reklamo. Nag-seminar na man unta mi sa MCWD pero ang nakapait kay kutob ra man ang mga tubo sa Poblacion, wala gihapon kaabot ang linya sa tubig diri sa among lugar.”
Brgy Granada, Boljoon, Cebu
“Daghan pa gihapon ang mga basura panahon pa ni pag bag-ong tuig ang wala pa gihapon kuhaa. Ang ubang mga basura gidauban na lang sa kilid sa karsada kay wala man atimana sa gobiyerno pagpanguha.”
Brgy Sta. Filomena, Alegria, Cebu
“Unsa na man ning among lugar sa Sitio Pulo, ang karsada pwerte na man nga gubaa. Wala man ni tagda sa mga opisyal namo sa barangay. Makit-an ra man ni namo sila kun duol na ang eleksyon nga moari diri sa among lugar.”
Brgy Talamban, Cebu City
“Problema kaayo mi sa tubig diri kay mag-usa na ka tuig nga wala gyud mi delivery. Pait kaayo ang among kahimtang diri sa Sitio Banica kay adlaw nga tanan mi mahasol pangita’g tubig nga among magamit sa pagluto, panglaba ug kaligo.”
Brgy Basak, Cebu City
“Grabe na man ning among agianan diri sa Holy Cross wala man tiwasa ang ilang gihimo nga kanal. Ang nakaparat kay gipasagdan lang, unya gihimo na man hinuong labayanan sa basura ang kanal maong misamot kalisod ang among agianan.”
Brgy Catmon-Daan, Catmon, Cebu
“Naunsa man ang tubig diri nga wala may pirmi agas sa adlawan, hasol kaayo namong nagpuyo diri kay usahay alas dose na tungang gabii moagas.”
Brgy Guadalupe, Carcar City
“Manawagan unta mi sa mga polis ug mga opisyal sa barangay nga ipahunong nila kining bunot-bunot atbang gyud sa eskwelahan kay ang mga bata intawon ang ilang mabiktima. Klaro man kaayo ning tikas ug matintal tawon ang mga bata paggasto sa ilang mga bawon.”
Brgy Pagsabungan, Mandaue City
“Awhagon nako ang mga opisyal namo diri sa barangay nga butangan og suga ning bakante nga lote nga agianan sa mga tawo kay ngitngit kaayo. Gani naa nay giabusohan diri nga babaye kay niagi nga siya ra usa, unya walay nakabantay kay pwerte man kangitngit.”
* * *
Alang sa inyong mga reklamo text lang sa 09062973166
- Latest
