Kaguliyang sa Comelec

Nagkaguliyang karon ang Commission on Elections tungod sa kaso ni Senador Grace Poe nga wala tugoti sa Comelec sa pagpapili pagka presidente sa nasud tungod kay dili siya natural-born Filipino citizen ug sa pagka kuwang pa sa tuig sa pagpuyo niya sa Pilipinas.

Tungod sa hukom sa Comelec, midangop ang senador sa Korte Suprema aron ipabaliktad ug pahukman nga walay bili ang hukom sa Comelec. Human madawat ang petition ni Poe, ang Comelec gipangayoan dayon og komento sa Korte Suprema aron mahukman sa daling panahon ang kaso nga diskuwalipikasyon.

Sila si Commissioners Arthur Lim ug Rowena Guanzon maoy mibarug para sa Comelec kay ang Office of the Solicitor General nga mao unta ang molaban ug abogado sa Comelec una na nga gikuha isip abogado sa Senate Electoral Tribunal nga gikiha usab ni Poe.

Ang pagsumitir nila ni Lim ug Guanzon sa komento sa Comelec didto sa Korte Suprema gi-question ni Comelec Chairman Andres Bautista kay wala kini pirma gikan kaniya.

Gimandoan ni Bautista si Guanzon nga mopasabot sulod sa 24 oras kun ngano nga gisumitir niini ang komento didto sa Korte Suprema nga wala ang iyang pirma.

Nagdumili sa pagtuman si Guanzon sa mando sa ilang chairman tungod sa rason nga wala kini gahum sa paghimo niini.

Kun mao kini, unsa kaha ang mahitabo sa umaabot nga piniliay kun magpadayon ang bangi ug kaguliyang sa mga sakop sa Commission on Elections?

Angay unta nga niining panahona, tutokan na nila ang mga angayang himuon aron mahimong katuohan ug malinawon ang nagsingabot nga eleksyon.

Isip usa ka independente nga commission dili unta kini magpaapekto sa inpluwensya sa politika.