Protektor sa mga durugista!

Giangkon sa kadagkoan sa Police Regional Office (PRO7) nga adunay mga sakop sa ilang organisasyon nga nalambigit sa illegal drug trade isip  mga protector. Dili lang sa PNP organization, kon dili, lakip na uban pa nga mga law enforcement agency ang padayon nga midula sa naasoy nga tinonto.

Niadtong nakalabay nga semana giadto sa mga sakop sa media, uban ang pipila ka opisyal sa barangay, ang balwarte sa notadong drug personality nga si Jeffrey Diaz o mas naila nga si Jaguar didto sa Barangay Duljo-Fatima, dakbayan sa Sugbo.

Nakita nga bukas na ang gate sa compound diin nahimutang ang mga maanindot nga panimalay niini, wala nay nagpuyo ug adunay nakabutang nga "for rent."

Gikonpirmar sa kapolisan nga wala na si Jaguar sa iyang balwarte human nakaikyas atol sa joint operation nga gilusad sa mga ahensya sa kagamhanan niadtong miaging tuig. Apan base sa intelligence report sa kapolisan, nagpadayon gihapon ang negosyo sa illegal drugs ni Jaguar dinhi sa rehiyon bisan og wala na siya sa dakbayan sa Sugbo sanglit nagpabilin man gihapon ang iyang mga galamay.

Ngano nga lisod man sumpuon ang suliran sa ilegal nga drugas? Ngano nga dili man madakpan ang mga bigtime drug personality sama ni Jaguar?

Ang tubag mao nga mismo sa PNP ug ubang ahensya adunay mga naghatag kanila og inpormasyon ug proteksyon aron dili sila madakpan.

Adunay daghan nga mga sakop sa PRO7 ang nalakip sa listahan base usab sa mga inpormasyon nga ilang nakuha gikan sa mga tipsters.

Gipaubos na sila sa imbestigasyon apan gikinahanglan nga adunay lig-on nga ebidensya aron masilotan sila. Ang mga alegasyon magpabilin hangtod nga wala’y mobarug nga saksi dala ang mga ebidensya nunot sa gitawag nga due process.

Karon pa lang, ang hingpit nga kasulbaran sa ilegal nga drugas kutob sa pangandoy lang!