EDITORYAL - Gusto lang mosalida

Dunay bulok politika ang pag-abli pag-usab sa Mamasapano Senate Inquiry. Wala’y laing nagpaluyo niini, kun dili, politika ra gyud ug gustong mosalida ang mga nangambisyon og posisyon sa umaabot nga eleksyon sa Mayo 9.

May gihimo na man nga imbestigasyon, 100 ka tawo ang gipasakaan og kaso sa Department of Justice, ngano nga dili na man lang sila makapaabot?

Unsa may gusto sa mga nagtinguhang mosalida nga mga senador, lawgawon na usab ang nasang-at na nga kaso?

Kun paspas nga hustisya ang gusto sa tanan alang sa 44 ka nakalas nga sakop sa PNP Special Action Force, dili kini mahitabo tungod sa kasensitibo sa sitwasyon ug sirkumstansya ilabi na nga nakataya niini ang upat ka dekada na nga kagubot sa Mindanao nga gusto nang matuldokan sa gobiyerno.

Bisan unsaon pa og balikas si PNoy karon, ug bisan kinsa pay makalingkod ug modaog pagka-presidente sa nasud sa 2016, dili nila mahimong mahatag ang maong hustisya sa mubo nga panahon.

Busa kining mga nanawagan karon pag-usab sa Mamasapano Probe, pasalida na lang ni kay election period na karon ug gusto nilang lutuong buhi si Aquino ug ang mga kandidato sa Liberal Party.

Sa unom ka tuig ni Aquino, daghan ang nanaway sa iyang pamunoan, sa isyu sa Yolanda, sa Mamasapano, hasta ang problema sa MRT, gibasol gihapon kang PNoy.  Iapil usab ang pagpanggukod niya sa mga kawatan ug mga kurakot nga opisyales sa gobiyerno nga daghan ang nanaway kay kuno pulos kontra sa partido ang iyang gilutos.

Unsa man diay angay buhaton, kadtong mga kontra bisan kawatan dili na gukdon?

Kun giobserbahan lang sa katawhan ang report sa pamantalaan kada adlaw, adunay opisyales sa gobiyerno, dili lang mga politiko, ang gipangkasohan sa Ombudsman.

Kining pagbukas pagbalik sa imbestigasyon, mosamot na nga mahikawan sa hustisya ang mga biktima, ilang pamilya ug ang katawhang Filipino.