Brgy Buaya, Lapu-Lapu City
“Daghang PUJ magpataka lang og parking diri sa merkado sa eskina Saac, magpatunga na hapit sa karsada ug gipasagdan ra sa mga traffic enforcers.”
Brgy Busay, Cebu City
“Ireklamo namo kining mga suga sa poste diri sa Sitio Kalubihan kay wala gyud atimana nga unta duha na ka kapitan ang nakasilbi diri sa among barangay. Sige ra sila’g saad nga ayuhon.”
Brgy Gun-Ob, Lapu-Lapu City
“Naproblema mi kay daghang magsige’g daub diri, adlaw ug gabii. Kuyaw sa sunog ang ilang gibuhat unya basin magkasakit ang mga bata tungod sa baho kaayong aso sa mga gipangsunog nila nga apil ang goma ug plastik.”
Brgy Centro, Mandaue City
“Ting-renew na sab sa permit sa mga tindahan diri sa merkado publiko, pero kaming mga gagmay nga namaligya pabayron apan kadtong dagkong manindahay sa karsada gipasagdan ra man sa nagdumala sa merkado.”
Brgy Guiwanon, Compostela, Cebu
“Ang karsada namo diri paingon sa Poblacion nga aspaltado unta pero mura ma’g batoon na kaayo. Kuyaw kaayo sa mga mabdos nga magsakay kay basin maahat og panganak kay sige’g untol-untol ang sakyanan.”
Brgy Suba, Bantayan, Cebu
“Grabe kamahal sa presyo sa mga baligyang isda diri nga isla man unta apan mas mahal pa man ang presyo kay sa diha sa siyudad. Unya kun mohangyo ta masuko pa gyud ang mga tindera.”
Brgy Lapaz, Bogo City
“Hangyo mi sa nagdumala sa Bogo Water District nga susihon ang dili maayong serbisyo kanamo nga mga konsumidor. Nagpataud mi’g linya sa tubig sa among balay para naa dayon mi magamit, apan ang problema kay wala may tubig nga moagas.”
Brgy Sta Filomena, Alegria, Cebu
“Bati na gyud kaayo ang karsada namo diri sa Sitio Kinyangan kay wala na atimana sa mga opisyal sa barangay. Kun mag-uwan, mura na gyud og sapa ang karsada.”
Brgy Tubod, Minglanilla, Cebu
“Ang karsada namo diri gihimo na man nga parkinganan sa mga tricycle ug multicab sa barangay. Misamot ang kahuot sa karsada kay ang ubang sakyanan moapil na sab nga mo-parking, samtang ang habalhabal magpatunga sab sa karsada kun maghuwat og pasahero.”
Brgy Guadalupe, Cebu City
“Ang dakong problema nga among ipaabot sa atong gobiyerno mao nga wala pa makaabot ang linya sa tubig diri sa Sitio Dakit. Manghinaot mi nga matabangan sa mga ahensya nga hingtungdan.”
Brgy Luray 2, Toledo City
“Kining akong reklamo bahin ni sa imburnal nga gihimo na man nga labayanan sa mga basura unya kun mag-uwan ari sa among kabalayan padung ang mga basura kay wala nama’y kanal.”
Alang sa inyong mga reklmao text lang sa 09062973166
- Latest
