Kawat og bata

Nahasol ang mga tagtungod sa pasyente sa Vicente Sotto Memorial Medical Center (VSMMC) sa kahigpit sa seguridad. Bisan dul-an na sa duha ka buwan silang nagbalikbalik sa ospital, kapkapan ug pangitaan lang gihapon sila og ID sa mga guwardiya sa atubangan. Nisamot ang ilang problema dihang nalimtan ang ID sa higdaanan sa ilang pasyente ug busa wa sila pasudla.

Sa ilang paningkamot nga makasud pagbalik aron makaatiman sa pasyente, natultolan nila ang dakong buslot sa seguridad sa VSMMC. Gawasnon silang makasud ug makagawas, nga way bisan usa nga magtagad pagsusi nagsul-ob ba sila og ID ug unsay ilang tuyo, kun moagi sa luyo sa ospital.

* * *

Mas unang nakadiskubre ang mga pasyente ug ilang mga tagtungod nga may mga sakyanan. Human niparada sa luyo sa VSMMC, nakaplagan nila nga mas sayon ang pagdiretso og sud agi sa trauma section inay nga molibot pa agi sa atubangan.

Natingob diay ang seguridad sa atubangan. Nga bisan ang mga sakop sa media nga nagsusi pilay nabuthan sa niaging pasko ug bag-ong tuig wa pasudla sa mga guwardiya. Kinsa nideklarar nga di paigo ang ilang IDs kun dili kinahanglan pang mopakita og authorization. Wa na mangutana ang reporters kinsay angay’ng mohatag sa authorization kay didto na lang mangayo sa kasayuran sa mas sayon nga sudlon nga Department of Health (DOH).

* * *

Dakong sagpa sa mga tagduma sa VSMMC ang pagkawat sa batang lalaki duha ka adlaw human gihimugso sa ospital. Kun di makapanalipod sa mga bata nga mao pay pagkatawo ug kun di makaila kinsay tinuod ug kinsay peke sa nag-uniporme nilang mga kawani, unsa na man lay nahibilin sa ilang kaligdong isip institusyon?

Gipasigarbo sa kadagkoan sa VSMMC ang ilang accreditation sa International Organization for Standardization (ISO). Nga gikahibung sa kasagaran sa ilang mga pasyente nga padayong nakasaksi sa naandan nilang kayamukat. Mga suhito sa ISO nangagpas nga mas hapsay kay sa aktuwal nga kahimtang sa ospital ang nasumiter nga mga dokumento.

* * *

Hinaut nga mailhan dayon sa mga imbestigador sa kapolisan ug sa National Bureau of Investigation (NBI) ang babaye nga way bilib sa ISO accreditation ug gipasanginlang nikawat sa bata. Kay mahimong di ang VSMMC ang una niyang biktima.

Pila ka gutlo sa wa pang insidente sa VSMMC, sa laing ospital nga way ISO accreditation apan mas abtik ang mga kawani, gibadlong sa mga tagduma sa information counter ang usa ka babaye, nga nagsul-ob og puti nga uniporme apan itom nga sapatos, nga nisuway unta pagsud. Human nasibya sa TV Patrol Central Visayas ang CCTV sa VSMMC nga nagpakita sa suspetsado, gitan-aw dayon sa mga kawani sa laing ospital ang ilang kaugalingong CCTV. Nakatag-an ka, samang babaye ang ilang nabalibaran.

[email protected]