EDITORYAL – LTO dili magpabayad

Tukma ang desisyon sa bag-ong hepe sa Land Transportation Office (LTO) nga mohunong usa sila pagkolekta og tag P50 alang sa plate sticker fee ug ingon man sa bayad alang sa bag-ong plaka sa mga sakyanan.

Dakong palpak sa mga kanhi nagdumala sa LTO nga padayon sila nga nangolekta og bayad alang sa plate sticker apan dili makaisyu niini. Ila ra nga patakan og “No Available Sticker” ang resibo sa pag-renew sa mga rehistro sa sakyanan.

Nangolekta pa gyud sila og tag P450 nga bayad kuno sa bag-ong plaka sa mga sakyanan ug misaad nga mahatag kini sa dili pa molapas ang 45 ka adlaw.

Apan wala makatuman ang LTO sa ilang saad kay gani hangtod karon, ang ilang napagawas nga bag-ong mga plaka sa sakyanan mao pa man ang mga plate numbers nga na-renew kaniadtong Enero sa miaging tuig.

Si kanhi LTO Chief Alfonso Tan mi-resign sa katungdanan nga nagbilin og daghang problema hinungdan nga nagbagutbot ang mga motorista.

Maayo ang hukom ni DOTC Assistant Secretary Roberto Cabrera nga ipahunong usa ang pagpangolekta sa bayad alang sa bag-ong plate numbers ug adto na mobayad ang tag-iya’g sakyanan kun moabot na ang bag-ong mga plaka.

Angay’ng palambuon ni LTO Chief Cabrera ang serbisyo sa LTO ingon man imando niya sa mga LTO regional directors nga molusad og paspas nga kampanya batok sa mga badlongon sa balaod aron dili modaghan ang mga abusadong drayber.

Kun padayong magkyugpos lang ang mga LTO agents ug dili manakop sa mga abusadong drayber, mas maayo pa nga wad-on na lang kining maong mga kawani ug isalig na lang ngadto sa kapolisan ug mga traffic enforcers ang pagpatuman sa mga lagda sa transportation and traffic code.