Gubot sa budget

Napagya karon sa siyudad sa Mandaue ang sekreto nga pagkampanya ni Luigi Quisumbing kang Senador Bongbong Marcos sa pagka-bise presidente, inay ang kandidata sa Liberal Party nga si Lennie Robredo.

Nagsugod ang pagduda nga i-itsa-puwera sa pamilyang Quisumbing si Robredo tungod sa gipapilit nila nga mga campaign tarpaulin sa nagkadaiyang lugar sa Mandaue nga anaa ang hulagway ni Luigi isip opisyal nga kandidato pagka-mayor sa LP sa maong siyudad, iyang bise mayor nga si Carlo Pontico Fortuna, ug line-up sa pagka-konsehal, ug ang ilang presidential candidate nga si Mar Roxas.

Apan wala sa tarpaulin ang hulagway ni Robredo. Mosugot ba kaha ang LP kun “hilaw” ang suporta ni Luigi ngadto sa partido, pinaagi sa pagyamiid kang Robredo nga maoy manok sa LP pagka-bise presidente?

Hinuon, “blood is thicker than water.” Kay kini si Luigi ug Bongbong paryente man sa side sa inahan sa kongresista ug sa inahan sa senador.

* * *

Nagka-alegre na ang Konseho sa siyudad sa Sugbo karon nga nagsingabot na ang eleksiyon. Sa balita gahapon, wala pirmahi ni Acting Mayor Edgardo Labella ang annual budget sa siyudad alang sa 2016 human gipasar sa konseho nga kasagaran mga sakop sa BOPK ug gi-preside ni Acting Vice Mayor Nestor Archival.

Gihimong rason ni Labella ang Local Government Code nga nagtugot pagpasar sa annual budget pinaagi sa mayoriya sa tanang konsehal. Siyam lamang sa 18 ang miboto sa ordinansa alang sa annual budget, tulo ang misupak. Asa man diay ang uban? Una niini nagubot ang Konseho kay gusto nga ipadakop sa mga konsehal sa Team Rama ang mga konsehal sa BOPK nga wala motunga sa sesyon aron tukion ang Supplemental Budget No. 1 nga anaa didto ang 400 porsiyento nga tubo sa tipping fee sa paglabay og basura, P2 milyones nga discretionary fund ni Mike, P1 milyon para sa scenic elevator ni sa opisina ni Mike, P21 milyones alang sa mga chaleco sa mga senior citizens, wala pay labot sa P700,000 nga retirement ni Joey Daluz, P810,000 kang Edu Rama, ug P100,000 nga bayad sa pizza nga snacks nga negosyo sa inahan sa uyab sa usa ka konsehal.

Nagkarakara silang mapasar kini, apan niadtong Setyembre 30, 2015 ang Team Rama ang mi-walkout maong wala matuki ang SB-1, unya nanglaag ang mga konsehal uban ni Mike sa Paris, France niadtong Nobiyembre maong wala gyud kini matuki. Maayo gani wala mapasar ang SB-1. Dili na hinuon angayan ipasar ang SB-1 niadtong Disyembre 30 kay usa na man lang ka adlaw ang nahibilin sa 2015. Ang maayong buhaton mao na lamang ang pagpasar sa 2016 nga annual budget.

Pero imbes pirmahan, wala mosugot si Labella. Ang 2016 annual budget mokabat og P6.4 bilyones. Apan kun dili kini mapasar, ma-reenact ang 2015 budget nga mokabat og P13.4 bilyones.