Kalaki sa Cebu City Council

Bisan sa Pasko ug Bag-ong Tuig, ang panahon sa pagsinabtanay ug pagtan-aw sa kaayohan alang sa publiko nga ilang gisaaran nga alagaran,  nagpatas-anay na hinoon sa kahibawo ug kaalam ang mga konsehal sa konseho sa dakbayan sa Sugbo.

Makapanglugmoy ang resulta sa special session nga gituyo sa pagpatawag aron unta matuki ang mga importanteng butang nga kinahanglang mahatagan sa labing dali nga pagtagad.

Usa sa mga agenda sa special session mao ang pagtuki sa makadaghan na nga higayong pagpadaplin ug wala gyud pagtagad sa pagpalabang, o pagpatay ba diha-diha, sa  P2.8 billion nga Supplemental Budget-1 ug ang pagpaubos unta sa Barangay Lahug sa state of calamity human maigo sa sunog ug nawad-an sa ilang mga pinuy-anan ang 175 ka pamilya.

Walay quorum nga nakab-ot sa special session niadtong Martes tungod kay ang mayoriya sa mga konsehal sa dakbayan sa Sugbo namakasyon sa Christmas break.  Matud sa secretariat sa Cebu City Council, sila ra ni konsehal James Cuenco, Lea Japson ug Arvin Arcilla ang ni-file sa ilang leave.

Ang uban nanibat nga wala mopahibawo og tarong nga dili sila makatunga sa special session. Si Konsehal Alvin Dizon giingong kalit nasakit gikan sa iyang pagka-busy sa ubang commitments, samtang si Konsehal Sisinio Andales bisan kun nakauli na gikan sa iyang bakasyon sa Bohol, wala gihapon nitunga sa session tungod kay matud niya wala kini kapuslanan.

Si  Konsehal Margot Osmeña giingong didto sa kaulohan nibakasyon. Ang ubang konsehal nga sakop sa BOPK wala motunga ug wala mohatag og klarong rason sa ilang pag-absent. Bisan si Konsehal Mary Ann delos Santos nga nakiglalis pa ni Acting Mayor Edgardo Labella sa niaging adlaw, tungod kay nasuko nga giapil sa pagguba ang kabalayan nga wala hingpit maugdaw sa sunog atol sa clearing operation, wala motunga sa special session.

Bisan kun ipadaplin pa sa mga sakop sa BOPK ang SB-1 tungod kay tuyo nila nga patyon kini hangtod sunod tuig sa pagtuki sa 2016 budget, gitan-aw unta nila nga aduna pay laing mas nanginahanglan sa dinalian nga pagtagad.

Ang makalulooy nga sitwasyon sa gatusan ka molupyo nga nasunogan sa Barangay Lahug.  Mosugat sila sa Bag-ong Tuig nga wala’y mga pinuy-anan ug wala’y klarong hinabang gikan sa siyudad tungod kay ang mga opisyal nagbakasyon pa.

Unsa kahay irason sa maong mga konsehal nga ni-isnab sa special session? Hinaot nga tinuod nga balido ang mga rason nga ilang ihatag sa pagpaningil sa mga Sugbuanon kanila.

Angay nila nga hinumdoman nga dili burong ang mga Sugbuanon. Makasabot kini ug makahibawo kun unsa’y pamolitika ug unsa’y tinuoray nga serbisyo.